«Ювентус» ҳужумчиси Жонатан Девид ёзги трансфер ойнасида жамоани тарк этиши мумкин. Бу ҳақда Corriere dello Sport нашри хабар берди.
Манба маълумотига кўра, Турин клуби 26 ёшли футболчини сотиш вариантини кўриб чиқмоқда ва унинг трансферидан тахминан 40 миллион евро ишлаб олишни режалаштирган.
Бироқ ҳозирча «Ювентус»га Жонатан Девид бўйича аниқ таклифлар келиб тушмаган.
Канадалик футболчи 2025 йилда эркин агент сифатида «Лилл»дан Турин клубига кўчиб ўтган эди. Унинг «Ювентус» билан амалдаги шартномаси 2030 йилнинг 30 июнига қадар амал қилади.
Девид 2025/26 йилги мавсумда барча турнирларда 46 та учрашувда майдонга тушиб, 8 та гол урди ва 5 та голли узатмани амалга оширди.
Тransfermarkt портали ҳужумчининг бозор қийматини 30 миллион еврога баҳоламоқда. Шунга қарамай, «Ювентус» футболчини қимматроқ нархда сотиш орқали трансфер бозорида фойда кўришни мақсад қилган.
