Ўзбекистон Республикаси Президенти Шавкат Мирзиёев ЖЧ-2026 гуруҳ босқичининг илк турида Колумбияга қарши баҳсдан сўнг миллий жамоани қўллаб-қувватлади.
Давлат раҳбари футболчиларимиз кучли ва тажрибали рақибга қарши муносиб ўйин кўрсатганини алоҳида таъкидлади.
«Ўзбекистон учун тарихий кун! Футболчиларимиз жуда катта тажрибага эга жамоага қарши кучли характерини кўрсатди. Биз учун биринчи жаҳон чемпионатида урилган биринчи гол ҳам катта ғалаба», — деди Президент.
Эслатиб ўтамиз, Ўзбекистон миллий жамоаси мундиалдаги тарихий илк учрашувида Колумбияга 1:3 ҳисобида мағлуб бўлди.
Миллий жамоамизнинг жаҳон чемпионатлари тарихидаги илк голига Аббосбек Файзуллаев муаллифлик қилди. У учрашувнинг 60-дақиқасида ҳисобни тенглаштиришга муваффақ бўлганди.
Маълумот учун, Ўзбекистон миллий жамоаси гуруҳ босқичидаги навбатдаги учрашувини 23 июн куни Португалияга қарши ўтказади.
