Колумбия миллий жамоаси вингери Луис Диас ЖЧ-2026 гуруҳ босқичининг 1-турида Ўзбекистон устидан қозонилган 3:1 ҳисобидаги ғалабадан кейин ўз фикрлари билан бўлишди.
«Бавария» футболчиси учрашувнинг 40-дақиқасида Даниел Мунёснинг голига ассист берган бўлса, 65-дақиқада ўзи ҳам гол уришга муваффақ бўлди. Шу тариқа у баҳснинг энг яхши футболчиси деб топилди.
«Бугун болаликдаги орзумни амалга оширдим — ўз мамлакатим сафида жаҳон чемпионатида майдонга тушдим. Бундай ўйинда гол уриш ва ассист қилишдан ҳам гўзалроқ нарса бўлиши мумкинми? Биз жуда аҳил жамоамиз. Ўйиндан ўйинга янада кучайиб борамиз. Ўзимни жуда бахтли ҳис қиляпман», — деди Диас ФИФА матбуот хизматига.
Эслатиб ўтамиз, Колумбия Ўзбекистонга қарши баҳсда 3:1 ҳисобида ғалаба қозонди. Жанубий америкаликлар сафида Мунёс, Диас ва Кампрас гол урган бўлса, Ўзбекистоннинг мундиаллар тарихидаги илк голига Аббосбек Файзуллаев муаллифлик қилди.
Колумбия миллий жамоаси гуруҳ босқичининг 2-турида 24 июн куни Конго ДРга қарши майдонга тушади. Ўзбекистон эса Португалия билан беллашади.
