Ўзбекистон миллий жамоаси ҳужумчиси Игор Сергеев Колумбияга қарши ўйин (1:3)дан сўнг ўз фикрларини билдирди.
«Колумбия яхши жамоа, аммо биз дурангга эришишимиз мумкин эди. Хатолар сабаб осон голлар ўтказиб юбордик.
Шунга қарамай, муносиб қаршилик кўрсатдик. Илк ўйин ҳар доим қийин кечади. Энди кейинги учрашувга бор эътиборимизни қаратишимиз керак», — деди ҳужумчи Metaratings нашрига берган интервюсида.
Биринчи ўйиндан сўнг Фабио Каннаваро шогирдлари гуруҳда сўнгги ўринни эгаллаб турибди. Кейинги баҳсни Ўзбекистон миллий жамоаси 23 июн куни Португалияга қарши ўтказади.
