«Ливерпул» клуби «Осасуна» вингери Виктор Мунос билан шартнома имзолаш бўйича музокараларни муваффақиятли якунлади. Бу ҳақда инсайдер Фабрицио Романо хабар берди.
Манбага кўра, томонлар ўртасида келишув амалга ошган. Испаниялик 22 ёшли футболчи мерсисайдликлар билан шартнома имзолайди.
Қайд этилишича, инглиз клуби Муносининг шартномасидаги 40 миллион евролик сотиб олиш бандини фаоллаштирган.
Футболчи «Реал» клуби тарбияланувчиси ҳисобланади. Ўтган клублар мавсумида у Памплона клуби таркибида 36 та ўйинда майдонга тушиб, еттита гол ва бешта голли узатмага муаллифлик қилди.
Transfermarkt портали футболчининг тахминий қиймати 30 миллион еврони ташкил этади. Унинг «Осасуна» билан амалдаги шартномаси 2030 йилнинг ёзигача мўлжалланган.
