УEФА Клублар молиявий назорат органи молиявий фейр-плей (FFP) қоидаларига риоя этилиши юзасидан навбатдаги ҳисоботини эълон қилди.
Унга кўра, Италиянинг «Рома» ва Франциянинг «Марсел» клублари молиявий кўрсаткичлар бўйича белгиланган мақсадларга эриша олмагани сабабли жаримага тортилди.
«Рома» 2025/26 йилги мавсум учун белгиланган оралиқ молиявий талабларни бажара олмади. Натижада римликлар 2 миллион евро миқдорида жаримага тортилди. Бундан ташқари, жамоанинг футболчилар таркибига сарфлаган харажатлари даромадининг 70 фоизидан ошиб кетгани учун яна 4 миллион евро жарима белгиланди.
Шу тариқа, «Рома» УEФАга жами 6 миллион евро тўлайди.
«Марсел»га нисбатан эса янада қаттиқроқ чоралар қўлланилди. Француз клуби талаб этилган рентабеллик даражасига эриша олмади ва 6 миллион евро жаримага тортилди.
Бундан ташқари, клубнинг футболчилар учун харажатлари ҳам рухсат этилган 70 фоизлик чегарадан ошиб кетгани сабабли қўшимча 4 миллион евро жарима қўлланди.
Шунингдек, УEФА «Марсел»га шартли спорт санкцияларини ҳам белгилади. Агар клуб 2026/27 йилги мавсумда молиявий кўрсаткичларни яхшилай олмаса, кейинги уч мавсум ичида йўлланма қўлга киритган илк еврокубок мусобақасидан четлаштирилиши мумкин.
Бундан ташқари, «Марсел»нинг 2026/27 йилги еврокубоклар учун янги футболчиларни рўйхатдан ўтказиш имкониятлари ҳам чекланади.
Айни пайтда «Милан», «Интер», «ПСЖ», «Монако», «Бешиктош», «Антверпен» ва «Трабзонспор» УEФА билан тузилган молиявий келишувлар талабларини тўлиқ бажарган ва эндиликда назорат дастуридан чиқарилган.
