Нидерландия миллий жамоаси ҳимоячиси Виржил ван Дейк 2026 йилги Жаҳон чемпионатидаги таркиб ҳақида фикр билдириб, жамоа катта натижаларга эришишга қодир эканини айтди.
«Кўплаб футболчилар Евро-2024да иштирок этган ва бу жуда муҳим тажриба бўлган. Уларнинг аксарияти учун бу илк йирик турнир эди. Ҳозир кўпчилик футболчилар фаолиятининг энг яхши даврида. Шунингдек, уларнинг катта қисми Европа Чемпионлар лигасида қатнашадиган топ-клубларда ўйнайди.
Аммо мен учун ҳаммаси буюк футболчиларга эмас, энг яхши жамоага боғлиқ. Биз мураббийлар штаби билан биргаликда муваффақият учун энг тўғри формулани топишимиз керак», — деди ван Дейк FIFА расмий сайтига.
Нидерландиялик футболчи жамоанинг Жаҳон чемпионатида ғолиб чиқиш имкониятига ҳам ишонишини яширмади.
«Ҳа, мен бунга ишонаман. Бизда жуда аҳил жамоа бор. Албатта, омад ҳам керак бўлади. Айрим футболчилар ҳал қилувчи паллаларда ўзини кўрсатиши, жароҳатлар бўлмаслиги муҳим. Ҳозирги футбол тақвими жуда тиғиз. Лекин таркибимизга қараганимда, биз алоҳида натижага эриша олишимизга ишонаман», — дея қўшимча қилди ҳимоячи.
Эслатиб ўтамиз, Виржил ван Дейк Нидерландия миллий жамоаси сардори ҳисобланади.
