Нидерландия миллий жамоаси ҳимоячиси Виржил ван Дейк 2026 йилги Жаҳон чемпионати олдидан пеналтилар сериясига тайёргарлик ҳақида фикр билдирди.
Футболчи жамоа доим бу жиҳат устида ишлашини, бироқ машғулотлардаги муваффақият расмий баҳсларда натижа кафолати эмаслигини айтди.
«Биз ҳар доим шундай қиламиз. Пеналтилар ҳақида доимо гап-сўзлар бўлади. Аммо ҳар куни пеналти машқ қилсангиз ҳам, бу муваффақиятни кафолатламайди. Машқ қилишда давом этиш керак. Масалан, Аргентина билан баҳсдан олдин барча пеналтиларни аниқ амалга оширгандим, кейин эса ўйин пайтида хато қилдим. Бу аччиқ сабоқ, аммо футбол шундай ва буни қабул қилиш керак», — деди ван Дейк FIFА расмий сайтига.
Ҳимоячи пеналтилар устида ишлаш давом этишини, бироқ жамоа баҳсларни асосий вақтнинг ўзида ҳал қилишни исташини қўшимча қилди.
Эслатиб ўтамиз, Нидерландия миллий жамоаси 2022 йилги Жаҳон чемпионатида Аргентина билан баҳсда пеналтилар сериясида мағлуб бўлганди.
Маълумот учун, ўша баҳсда Виржил ван Дейк пеналтилар сериясидаги зарбасини голга айлантира олмаганди.
