«Манчестер Юнайтед»нинг собиқ дарвозабони Петер Шмейхел «Челси»га қарши баҳсдаги 0:2 ҳисобидаги мағлубиятдан сўнг Лисандро Мартинесни кескин танқид қилди. Унинг фикрича, аргентиналик ҳимоячи жамоанинг муваффақиятсизлиги учун асосий жавобгар.
АПЛнинг 9-туридан ўрин олган беллашувда Мартинес 50-дақиқада Морган Рожерснинг голига тўсқинлик қила олмади. 59-дақиқада Рожерсга қарши қўполлиги учун сариқ карточка олди, 63-дақиқада эса ўз жарима майдонида Уесли Фофанага қўли билан зарба бергани сабаб майдондан четлатилди. Белгиланган пеналтини Коул Палмер аниқ амалга оширди.
«Ушбу мағлубият учун барча айбни Лисандро Мартинес зиммасига юклайман. Унинг бу баҳсдаги ўйини мутлақо шармандалик.
Икки ҳафта олдин у жамоадошлари ва клуб ҳақида жуда кескин фикрлар билдирганди. Менда у «МЮ»дан кетишни ташкил этишга уринаётгандек таассурот пайдо бўлди.
У «Манчестер Юнайтед» даражасидаги футболчи эмас. Бугун буни яна бир бор кўрсатди», — деди Шмейхел.
Маълумот учун, Мартинес «Челси»га қарши баҳснинг 63-дақиқасида қизил карточка олиб, жамоасини камчиликда қолдирди.
Эслатиб ўтамиз, «Челси»дан учралган мағлубиятдан кейин «Манчестер Юнайтед»нинг барча мусобақалардаги ғалабасиз серияси тўққизта баҳсга етди. Ушбу даврда жамоа олти марта мағлубиятга учраган ва уч бор дуранг ўйнаган. Бу клубнинг 1988 йилдан буён қайд этган энг ёмон натижасидир.
