«Ливерпул» яримҳимоячиси Алексис Мак Аллистер «Арсенал»га қарши бўлажак баҳс олдидан рақибнинг кучли жиҳатларини эътироф этди. Шу билан бирга, аргентиналик футболчи мерсисайдликлар Лондон клубини мағлуб этишга қодир эканини таъкидлади.
«Улар ҳозир бизга қараганда яхшироқ ҳолатда. Айни пайтда «Арсенал» дунёнинг энг яхши жамоаларидан бири. Буни аввал ҳам айтганман. Улар мақтовга лойиқ.
Баҳс жуда қийин кечади. Аммо уларни мағлуб эта оладиган жамоа бўлса, менимча, бу — биз. Айниқса, «Энфилд»да», — деди Мак Аллистер.
Футболчи бунинг сабабини жамоа ва мухлислар ўртасидаги яқинлик, шунингдек, «Ливерпул» рақибини қандай мағлуб этишни билиши билан изоҳлади.
«Биз кучайиб боряпмиз ва ғалаба қозонишимиз кераклигини яхши биламиз. Мухлислар билан жамоа ўртасидаги боғлиқликни ҳис қиляпман. Бу жуда муҳим. Қолаверса, «Арсенал»ни қандай ютишни биламиз — буни аввал ҳам уддалаганмиз. Бизда жуда яхши жамоа бор», — дея қўшимча қилди аргентиналик яримҳимоячи.
Маълумот учун, АПЛнинг 9-тури доирасидаги «Ливерпул» — «Арсенал» баҳси 1 ноябр куни «Энфилд» стадионида бўлиб ўтади. Лондонликлар «Манчестер Сити» билан бир хил очко жамғарган ҳолда пешқадамлик қилмоқда, «Ливерпул» эса улардан олти очко ортда қолган.
Эслатиб ўтамиз, «Ливерпул» «Арсенал»га қарши сўнгги тўртта баҳсда мағлуб бўлмаган: мерсисайдликлар бир марта ғалаба қозонган, яна учта беллашув дуранг билан якунланган.
