Мадриднинг «Реал» клуби 2025/26 йилги мавсум якунлари бўйича тиббий департаментни тўлиқ қайта ташкил этишга киришди. Бу ҳақда Тhe Athletic хабар берди.
Манбага кўра, бунга мавсум давомида футболчиларнинг кўплаб жароҳат олгани ҳамда Килиан Мбаппе билан боғлиқ хато ташхис сабаб бўлган. Ўтган йилнинг декабрь ойида клуб шифокорлари франциялик ҳужумчининг жароҳатини текширишда тиззани нотўғри сканер қилган ва бунинг оқибатида нотўғри ташхис қўйилган. Кейинчалик Мбаппенинг ўзи бу воқеани рад этган.
Қайд этилишича, январ ойида лавозимидан четлатилган тиббий хизматнинг собиқ раҳбари Фелипе Сегура клубни тарк этмоқда. Тиббий штабнинг яна бир аъзоси Маноло Арроё эса аввалроқ истеъфога чиққан.
Тиббий бўлимдаги ислоҳотларга Сегурадан кейин лавозимга тайинланган Нико Михич бошчилик қилмоқда. Шунингдек, «Монако» тиббий департаменти раҳбари Александр Крёз ҳам клуб сафига қўшилиши кутилмоқда.
Бундан ташқари, 10 июльдан иш бошлайдиган бош мураббий Жозе Моуриню штабига янги жисмоний тайёргарлик бўйича мураббий Антониу Диаш қўшилади. Клубнинг узоқ йиллик ходими Антонио Пинтус эса ўз лавозимида қолади.
Маълумот учун, ўтган мавсум «Реал»нинг 25 нафар майдон футболчисидан фақат уч нафари — Фран Гарсия, Браим Диас ва Винисиус Жуниор бирорта ҳам жароҳат олмади.
Клуб президенти Флорентино Перес май ойида шундай деганди: «Ҳаммаси Клублар ўртасидаги Жаҳон чемпионатидан бошланди. Биз нормал мавсумолди тайёргарлигини ўтказа олмадик. Натижада мураббий алмашган даврда 28 та, ундан кейин яна 28 та жароҳат қайд этилди».
