«Брага»га ўтиш таваккалчилик эмас» — Сайфиддин Содиқов билан эксклюзив интервю

Бугун Португалиянинг «Брага» клуби икки нафар ҳамюртимиз – Сайфиддин Содиқов ва Садриддин Ҳасановнинг трансферини расман эълон қилди.

Tribuna.uz эса ўтган ҳафтада биринчи бўлиб, ушбу футболчиларимизни «Брага» аъзосига айланишганини ва шартномага имзо чекишгани хусусида маълум қилганди. Ниҳоят, бугун, бир неча соат олдин клуб расман эълон қилди.

Табиийки, Tribuna.uz Содиқов билан дастлабки эксклюзив интервюни уюштирди.

- Сайфиддин фаолиятингизда янги саҳифа очилди. «Брага»да сизларни қандай қарши олишди?

- Албатта, янги саҳифа очилди. Бу энди фаолиятимда катта қадам ҳисобланади. Бизни бу ерда барчаси жуда яхши кутиб олишди. Қишда ҳам шу ерда бўлгандик. Ўшанда икки ҳафталик йиғинда қатнашганимизда ҳам клуб мураббийлари, футболчилари қўлдан келганича бизни қўллаб-қувватлашганди. Ҳозир ҳам барчаси яхши.

- 18 ёшда Европага кетиш - бу катта таваккалчилик эмасми, нима деб ўйлайсиз?

- Менимча, таваккалчилик деб ўйламайман. Чунки 18 ёшда кўп футболчилар Европада асосий таркибларда ўйнашяпти. Шунинг учун таваккалчилик, деб ҳисобламайман. 18 ёш – энди кичкина ёш эмас. Бу ёшда бемалол катталар футболида рақобат қилса бўлади, деб ўйлайман.

- Умуман олганда, у ерда ўзингизни кўрсатиш учун ҳар томонлама тайёрмисиз?

- Бу ерда ўзимни максимал даражада яхши тарафларимни кўрсата оламан ва бунга ҳозирдан тайёрман.

- «Брага» клубидаги шароитлар, инфратузилма қандай экан? Масалан, сизларга қандай шароитлар яратилди?

- «Брага»даги шароитларни барчаси топ даражада. Футбол учун ҳамма қулай шароитлар яратиб берилган. Бу ерда биз учун клуб шифокорлари алоҳида таомлар тайёрлаб, яхши шароитлар яратиб беришяпти.

- Асосий жамоа билан шуғулланяпсизларми ёки ёшлар жамоаси биланми ва машғулотлари қандай ўтяпти?

- Ҳозирча асосий жамоаси билан эмас, U-23 жамоаси билан шуғулланяпмиз. Бу ердаги машғулотлар ҳам топ даражада.

- Бу қарорни қабул қилишда сизларга қандай маслаҳатлар беришди?

- Албатта, қарор қабул қилишдан олдин мураббийларим ва кўпчилик масҳалат беришди. Осон бўлмаслигини ва балки бундай катта имконият бошқа бўлмаслиги мумкинлигини, шу сабабли ўзимни ҳар томонлама яхши кўрсатиб, ушбу имкониятдан фойдаланиб қолишим учун барча керакли кўрсатмаларни беришди.

- Янги жамоада қайси рақамни танладингиз?

- Ҳали рақам танламадим. Чунки мавсум бошланишига бир ойча вақт бор. Рақамни чемпионат бошланишига яқин вазиятга қараб танлайман.

- Мураббий билан илк суҳбатингиз қандай ўтди?

- Мураббий билан биринчи суҳбатимиз яхши кайфиятда ўтди. Келган пайтимизда мураббийни ўзи бизни ажойиб кайфиятда кутиб олди. Ҳали тўлиқ гаплаша олмадик, сабаби, тил борасида бироз муаммо борлиги учун. Аммо бироз бўлса-да, суҳбатлашдик.