«Нюкасл Юнайтед» «Аякс» яримҳимоячиси Шон Стейр трансферини расман эълон қилди. Бу ҳақда клуб матбуот хизмати хабар берди.
18 ёшли нидерландиялик футболчи «қарғалар» билан беш йиллик шартнома имзолади. Трансфер суммаси ошкор қилинмаган. У янги жамоасида 14-рақам остида тўп тепади.
Стейр ёзги трансфер ойнасида «Нюкасл» сафига қўшилган учинчи янги футболчига айланди. Ундан аввал клуб франциялик дарвозабон Эвен Жауен ва ивуарлик вингер Базуман Туре билан шартнома имзолаганди.
Ўтган мавсум яримҳимоячи «Аякс» академиясининг энг яхши ёш футболчисига бериладиган Абделҳак Нури совринига лойиқ кўрилган.
«Бу ерда бўлиш — ажойиб туйғу. «Нюкасл» — Англия Премер-лигасининг улкан клубларидан бири. Дунёнинг энг кучли чемпионатида ўйнаш доим орзуим бўлган. Мен «Аякс»да ўзимни уйимдагидек ҳис қилардим, чунки у ерга етти ёшимда келганман. Аммо сизни «Нюкасл» каби клуб таклиф қилса, рад этиш жуда қийин», — деди Стейр клуб матбуот хизматига.
