«Милан» яримҳимоячиси Лука Модрич мавсумнинг қолган қисмида майдонга туша олмайди. У ёноқ суягининг синиши туфайли сафдан чиқди.
Хорватиялик футболчи А Серия 34-туридан ўрин олган «Ювентус»га қарши (0:0) ўйинда тўп учун ҳаводаги кураш пайтида билан рақиб аъзоси Мануиэл Локателли билан тўқнашиб кетиши натижасида жароҳат олди. Унга тиббий ёрдам кўрсатилгандан сўнг 80-дақиқада майдонни тарк этди.
Хорватиянинг Jutarnji list нашри хабар беришича, Модричда ёноқ суягининг икки карра синиши аниқланган. Шу сабабли у мавсумнинг қолган ўйинларини ўтказиб юборади. Бу маълумотни инсайдер Фабрицио Романо ҳам тасдиқлади. 40 ёшли яримҳимоячига жарроҳлик амалиёти керак бўлиши ҳам мумкин.
Шу билан бирга, Модрич ЖЧ-2026да Хорватия миллий жамоаси сафида ўйнай олади — эҳтимол, у мусобақада ҳимоя ниқоби тақиб иштирок этади.
Аввалроқ «Интер» яримҳимоячиси Ҳоқон Чалхонўғли учун мавсум якунлангани хабар берилганди.
