Дортмунднинг «Боруссия» клуби марказий ҳимоячиси Нико Шлоттербек «Реал» томонидан бўлаётган қизиқиш ҳақидаги саволга жавоб берди.
«Ҳа, албатта, бу ҳақда ОАВ орқали билиб оласиз. Аммо бир неча ҳафта аввал айтганимдек, ҳозир бутун эътибор жаҳон чемпионатига, биринчи ўйинга қаратилган», — дея Шлоттербекнинг сўзларини келтиради Mundo Deportivo.
Аввалроқ Bild нашри «қаймоқранглилар» ҳимоячининг трансфери учун 50-60 миллион евро таклиф қилиши мумкинлиги ҳақида хабар берганди.
Ўтган мавсумда Шлоттербек барча турнирларда 37 та ўйинда иштирок этиб, бешта гол урди ва иккита голли узатмани амалга оширди.
Футболчининг клуб билан амалдаги меҳнат шартномаси 2031 йилнинг ёзигача мўлжалланган.
Transfermarkt порталида келтирилган маълумотларга кўра, футболчининг бозор қиймати 55 миллион еврони ташкил этади.
