Ўзбекистон Президенти Шавкат Мирзиёев миллий жамоанинг ЖЧ-2026даги иштироки юзасидан фикр билдириб, жамоа тарихий натижага эришганини таъкидлади.
«Ўзбекистон миллий жамоаси Мустақиллигимизнинг 35 йиллигида тарихда илк бор Жаҳон чемпионатида иштирок этди. Мана шунинг ўзи биз учун жуда катта воқеа бўлди.
Дунёнинг энг нуфузли футбол мактаблари билан ҳамкорлик қилиб, ўзбек футболининг брендини шакллантиришга ҳаракат қиламиз. Чунки эндиликда халқимиз кейинги мундиалда қандай иштирок этишимизни кутади.
Бундан буён иқтидорли ёшларга янада катта эътибор қаратилади. Келгуси йилнинг январ ойида Саудия Арабистонида бўлиб ўтадиган Осиё кубогига бугундан тайёргарликни бошлаймиз. Мен топшириқ бердим: футболчиларимизни катта тантана билан кутиб оламиз ва бўлажак мусобақага жиддий тайёргарлик кўрамиз.
Биз жамоамизга ишонамиз ва уларни яна бутун халқимиз билан қўллаб-қувватлаймиз. Мен йигитларга аллақачон айтганман — улар тарих яратишди.
Биз футболни умуммиллий спорт турига айлантирамиз. Футбол ва ушбу мундиал халқимизни янада жипслаштирди. Олдинда бу борада яна кўплаб ижобий ишларни амалга оширамиз. Энди ортга йўл йўқ. Бундан кейин фақат сабр қилиш керак ва натижа албатта келади», — деди Шавкат Мирзиёев.
Эслатиб ўтамиз, Ўзбекистон терма жамоаси ЖЧ-2026 гуруҳ босқичида Португалия, Колумбия ва Конго ДРга қарши баҳсларда майдонга тушди. Вакилларимиз учала учрашувда ҳам мағлуб бўлиб, мусобақани гуруҳ босқичидаёқ якунлади.
