Колумбия миллий жамоаси бош мураббийи Нестор Лоренсо Португалияга қарши учрашув олдидан ўз фикрлари билан ўртоқлашди.
«Португалиянинг кучли жамоа ва ажойиб мураббийга эга эканини яхши биламиз. Шунинг учун тасодифга умид қилиб бўлмайди. Улар бир-бирини яхши тушунадиган шаклланган жамоа ва биз катта ўйин кутаётганимизга ишонаман.
Рақибнинг хусусиятларидан қатъи назар, ўз услубимиз ва ўйин фалсафамизга содиқ қолишни режалаштирганмиз. Португалия ўрта блокда ҳимояланади, тўпга эгалик қилишни яхши кўради ва ҳужумларни самарали якунлаш учун тўпни олдинга олиб чиқишни билади. Улар жуда яхши ташкил этилган жамоа, кучли мураббийлар штабига эга ва таркибида фақат элита даражасидаги футболчилар жамланган», — деди Лоренсо FIFA расмий сайтига.
