Англия миллий жамоаси ҳужумчиси Ҳарри Кейн ЖЧ-2026 1/16 финалида Конго ДРга қарши баҳсда (2:1) дубл қайд этиб, турнирдаги голлари сонини бештага етказди.
«Бавария» форварди учрашувнинг 75-дақиқасида ҳисобни тенглаштирган бўлса, 86-дақиқада Англияга ғалаба келтирган голни урди.
Шу тариқа, Кейн ушбу мундиалдаги тўрт учрашувда 5 та гол муаллифига айланди. У аввалроқ Панама дарвозасини бир марта ишғол қилган ва Хорватияга қарши баҳсда ҳам дубл қайд этганди. Фақат Гана билан голсиз якунланган учрашувда гол ура олмади.
Эслатиб ўтамиз, ЖЧ-2026 тўпурарлар пойгасида Ҳарри Кейндан фақат Лионел Месси ва Килиан Мбаппе олдинда бормоқда. Уларнинг ҳар бири ҳисобида 6 тадан гол бор.
Маълумот учун, Ҳарри Кейн Жаҳон чемпионатлари тарихида Англия жамоаси сафида 13 та гол урган ва ушбу кўрсаткич бўйича мамлакат рекордчиси ҳисобланади.
