«Бавария» ҳужумчиси Ҳарри Кейн Германияда 2025/26 йилги мавсумнинг энг яхши футболчиси деб топилди. Бу ҳақдаги натижалар Kicker журнали томонидан ўтказилган сўровнома якунларига кўра эълон қилинди.
Овоз беришда Германия спорт журналистлари ассоциациясининг 659 нафар аъзоси иштирок этди. Кейн 272 та овоз билан биринчи ўринни эгаллади.
Иккинчи ўрин ҳам «Бавария» футболчиси Майкл Олисега насиб этди. У 203 та овоз тўплади. «Штутгарт» ҳужумчиси Дениз Ундав эса 61 та овоз билан кучли учликни якунлади.
Бу Кейн учун Германияда йилнинг энг яхши футболчиси совринини қўлга киритишдаги илк муваффақият бўлди.
Йилнинг энг яхши мураббийи номинациясида эса «Бавария» устози Венсан Компани ғолиб чиқди. Белгиялик мутахассис 314 та овоз олди. Иккинчи ўринни «Фрайбург» бош мураббийи Юлиан Шустер 87 та овоз билан, учинчи ўринни эса «Штутгарт» устози Себастян Ҳёнес 53 та овоз билан эгаллади.
Маълумот учун, Германияда «Йил футболчиси» соврини 1960 йилдан, «Йил мураббийи» мукофоти эса 2002 йилдан бери топшириб келинади. Футболчилар орасида Франц Беккенбауер 4 та соврин билан рекордчи ҳисобланади. Мураббийлар орасида эса Юрген Клопп ва Феликс Магат 3 тадан мукофот билан етакчилик қилмоқда.
Кейн ва Компани ўз мукофотларини «Бавария»нинг «Штутгарт»га қарши Бундеслига янги мавсумидаги илк учрашуви вақтида «Алянс Арена»да қабул қилиб олади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади