Бу ҳақда BBC Sport хабар берди.
Испания миллий жамоаси ва «Кристал Пэлас» вингери Йереми Пино жаҳон чемпионати-2026 қолган қисмини жароҳат сабаб ўтказиб юбориши мумкин. Футболчи Уругвайга қарши баҳсда (1:0) ўмров суягини синдириб олган бўлиши мумкин.
Футболчи 66-дақиқада Алекс Баэнанинг ўрнига майдонга тушди. Асосий вақт якунланишига яқин у чап елкаси билан ноқулай тарзда йиқилди. Шифокорлар ёрдамидан кейин кучли оғриққа қарамай, футболчи ўйинни давом эттирди. Бу пайтга келиб Испания барча ўзгаришларни амалга ошириб бўлгани туфайли Пино майдонда финал ҳуштагига қадар ҳаракат қилди.
Бугун, 27 июн куни вингер чуқурлаштирилган тиббий текширувдан ўтади ва бир қатор таҳлиллар топширади. Ўмров суяги синиши уни ЖЧ-2026 охиригача сафдан чиқаради.
Маълумот учун, 7 очко жамғарган Испания плей-офф босқичига биринчи ўриндан чиқди.
