Ислом Аҳмедов: «Ҳаммага тенг ўйин амалиёти бермоқчимиз»

Минксда ёзги йиғинини ўтказаётган «Андижон» клуби бугун дастлабки ўртоқлик учрашувини маҳаллий «Крумкачи»га қарши ўтказди. Голларга бой ўтган ўйинда андижонликлар 3:2 ҳисобида ғалаба қозонди.

Ўртоқлик ўйинидан «Андижон» бош мураббийи Ислом Аҳмедов ўз фикрлари билан ўртоқлашди.

- Ислом Ғуломович, «Андижон» Минск йиғинидаги илк ўртоқлик ўйинини ўтказди. Таассуротларингиз қандай?

- Узоқ танаффусдан кейинги биринчи ўртоқлик ўйинимиз. Барибир шу нарса ўйин кечишига таъсир қилди. Ўйин натижаси қониқарли, аммо ҳали ишлайдиган камчиликларимиз кўп. Рақиб биз ўйлагандан кўра яхшироқ жамоа экан. Очиғи, бундай ўйин кўрсатишларини кутмагандик. Бизга яхши рақобат кўрсатишди. Қандай камчиликлар устида ишлашимиз кераклигини кўрсатиб беришди.

- Иккала бўлимда икки хил таркибни кўздан кечирдингиз. Футболчиларни ҳаракатлари хусусида нималар дея оласиз?

- Биринчи бўлимда 0:0 кузатилди ва йигитларда мувозанат, ҳаммаси жойида эди. Ҳисобни очганимиздан кейин бу ҳол бизни бироз бўшаштирди. Шу ҳисобига голлар ўтказиб юбордик. Йигитлар бироз мувозанатни йўқотиб қўйишди. Албатта, иккинчи бўлимдаги футболчилар ҳам астойдил ҳаракат қилишди. Уларга 30 дақиқа ўйнашгани ҳисобига ўз имкониятидан фойдаланишга вақт етмади. Бугун 30 дақиқа учун майдонга тушганлар эртага 60 дақиқа ўйнашади. Бизни тайёргарлик йиғинимизда барчаси режалаштирилган. Ҳаммага тенг ўйин амалиёти бермоқчимиз, барчани бир хил формада ушлаб туриш учун.

- Йиғиндан ҳар томонлама қониқиб боряпсизми?

- Ишлашда давом этяпмиз. Тайёргарлик жараёнида яна 10 кун вақтимиз бор. Шу вақт давомида тайёргарлигимиз қанчалик кетаётганини кўриб борамиз. Ҳозирги камчиликларимиз устида ишлаб, охирги ўйинлардан кейин қанчалик кўнглимиз тўлди ёки тўлмаганини айтишимиз мумкин», - дея Аҳмедовнинг сўзларидан келтиради, Tribuna.uz мухбири.