Белгия миллий жамоаси бош мураббийи Руди Гарсия 2026 йилги жаҳон чемпионати чоракфинал босқичи доирасидаги Испанияга қарши ўйин (1:2)дан сўнг ўз фикрлари билан ўртоқлашди.
«Биз испанияликларнинг кўзига тик қарадик ва уларни, айниқса ҳисобни тенглаштирганимиздан кейин, ўзларига шубҳа қилишга мажбур этдик.
Афсуски, ўйинни қўшимча вақтгача олиб бора олмадик. Ҳаммасини майда деталлар ҳал қилди. Биз бир нечта хатоларга йўл қўйдик, Испаниядек жамоага қарши эса бундай қилиш мумкин эмас. Уларга совға қилишга ҳаққимиз йўқ эди.
Ёш футболчилар бундан сабоқ чиқаришлари керак. Айнан шу хатолар турнирни давом эттириш имкониятидан маҳрум қилди. Лекин биз бир жамоамиз ва ҳеч кимни айбламоқчи эмасмиз.
Мен футболчиларим билан чин дилдан фахрланаман. Биз Белгия ушбу жаҳон чемпионатининг энг яхши жамоаларидан бири эканини исботладик.
Балки янада узоқроқ боришимиз ҳам мумкин эди, биз бунга жуда яқин келгандик. Лекин саёҳатимиз айнан шу ерда якунланганини қабул қилишимиз керак.
Биз Белгия халқига орзу ҳадя этдик. АҚШ устидан қозонилган ғалабадан кейин Белгиядаги ва фан-зоналардаги муҳитни кўриш жуда ёқимли эди.
Барча 12 миллион белгиялик ушбу жамоани қўллаб-қувватлади. «Қизил иблислар» билан иш бошлаганимда айнан шуни мақсад қилгандим.
Албатта, жароҳатлар ҳам бизга ёрдам бермади. Юри Тилеманс ўйин олди машғулот вақтида жароҳат олди, кейин эса Тибо Куртуа майдонни эрта тарк этишга мажбур бўлди. Кевин де Брюйне ҳам учрашувни охиригача давом эттира олмади», — деди Гарсия.
Мухлислар бу янгиликни Telegram’да муҳокама қилмоқда
Изоҳлар Telegram’да очилади