«Манчестер Юнайтед»нинг собиқ яримҳимоячиси Андер Эррера Жозе Моуринио «Манчестер Сити»нинг қимматбаҳо трансферларига бир неча йил аввал эътибор қаратганини айтди. Бу ҳолат «шаҳарликлар» Англия Премер-лигасининг молиявий қоидаларини бузганини тан олишидан анча олдин юз берган.
«Моуринио қайсидир маънода «Симпсонлар» мультсериалига ўхшайди: у айтган нарсаларнинг барчаси келажакда амалга ошади. У бизга «Манчестер Сити»нинг бирданига тўрт нафар ҳимоячини сотиб олиши, кейин эса Кевин Де Брюйне, Илкай Гюндоған ёки бошқа футболчини жамоага олиб келиши нормал ҳолат эмаслигини айтарди.
Агар футболчилардан бири клубга келганидан олти ой ўтиб ўзини кўрсата олмаса, унинг ўрнига бошқасини сотиб олишади. Моуринё бундан жаҳли чиқарди ва у ҳақ эди», — деди Эррера Rio Ferdinand Presents YouTube каналига берган интервюсида.
Маълумот учун, Моуринио «Манчестер Юнайтед»ни 2016–2018 йилларда бошқарган. Эррера эса ушбу даврда португалиялик мураббий қўл остида тўп сурган.
Эслатиб ўтамиз, «Манчестер Сити» Англия Премер-лигасининг молиявий қоидаларини бузиш билан боғлиқ иш бўйича узоқ давом этган жараёнга дуч келган.
