«Барселона» Ямалнинг ЖЧ-2026 илк турида майдонга тушишига рухсат берди

«Барселона» Ламин Ямал Испания миллий жамоасининг ЖЧ–2026даги илк ўйинида иштирок этиш учун рухсат берди. Бу ҳақда AS хабар берди.

Каталония клуби 18 ёшли вингернинг тикланиш жараёнини диққат билан кузатмоқда. Футболчи 22 апрел куни «Селта»га (1:0) қарши «Камп Ноу»даги баҳсда пеналтини амалга оширганидан кейин чап сон мушакларидан жароҳат олганди. У 30 май куни ҳали тикланиш жараёнида бўлган ҳолда Испания миллий жамоаси йиғинига қўшилди.

«Барселона» Ламиннинг Жаҳон чемпионатидаги Испаниянинг биринчи ўйини — Кабо-Вердега қарши 15 июн куни бўлиб ўтадиган баҳсгача сафга қайтишини маъқуллади. Клуб ҳисоб-китобига кўра, шу вақтга келиб режалаштирилган олти ҳафталик тикланиш муддати якунланади ва асоратлар кузатилмаса, футболчига тиббий штаб томонидан рухсат берилиши мумкин.

Бироқ муҳим шарт бор: қайтиш босқичма-босқич амалга оширилиши керак. «Барселона» Ямалнинг Кабо-Вердега қарши ўйинни асосий таркибда бошлашини кутмаяпти. Энг кўпи билан у майдонга сўнгги 15 дақиқада туширилиши мумкин.

Агар футболчи ўзини яхши ҳис қилса, иккинчи турда Саудия Арабистонига қарши 45–60 дақиқа ўйнаши мумкин. 27 июнга белгиланган Уругвай билан сўнгги тур баҳсида эса у асосий таркибда майдонга тушиб, тўлиқ ўйин ўтказишга тайёр бўлиши мумкин.

Шу билан бирга, «Барселона» фақат Ямалнинг ҳолатини эмас, балки Испания миллий жамоасидаги барча ўз футболчиларининг жисмоний ҳолатини ҳам назорат қилиб боради. Клуб ҳар куни улар ҳақида маълумот олиб туради ва ҳар бир футболчи бўйича ҳафталик ҳисоботлар талаб қилади.