Салиба: «Бизни узоқ вақт масхара қилишди. 1-ўринда эканлигимизда ҳам эртами-кеч қоқилишимизни айтишди»

Вилям Салиба «Арсенал» устидан қилинган ҳазилларга муносабат билдирди.

Ушбу мавсумда Лондон клуби 22 йиллик танаффусдан сўнг илк бор Англия чемпионига айланди.

«Бизни узоқ вақт масхара қилишди. Ҳатто биринчи ўринда кетаётганимизда ҳам ҳамма эртами-кечми қоқилишимизни айтарди. Бу — футбол. Агар одамларнинг бундай муносабатини ўзгартиришни истасанг, шунчаки ғалаба қозонишинг керак. Биз ғалаба қозондик ва энди улар жим бўлиб қолишди.

Келганимдан кейинги биринчи мавсумда жуда ажойиб футбол намойиш этгандик. Менимча, айнан ўша мавсумда чемпионликка энг кўп муносиб эдик. Аммо одатдагидек иккинчи ўринни олганимиз учун одамлар бизни масхара қилишди.

Иккинчи мавсумда ҳам яна иккинчи бўлдик. Ўтган мавсумда ҳам яхши ўйнадик, лекин яна иккинчи ўрин билан чекландик. Бу мавсумда одамларнинг биз ҳақимизда «фақат тўпни олдинга тепадиган жамоага айланиб қолишди» деган гапларига қўшилмайман. Биз ҳам футбол ўйнаймиз.

Ҳа, стандарт вазиятлардан кўп гол ураётганимиз рост — бу шунчаки ақлбовар қилмайдиган даражада. Аммо ҳозир Премер-лигада барча жамоалар узун узатмалардан, бурчак тўпларидан ва стандарт вазиятлардан фойдаланмоқда. Фақат биз эмас. Шунчаки, биз стандартлардан бошқаларга қараганда кўпроқ гол уряпмиз», — деди Салиба L'Équipe нашрига берган интервюсида.