Ўзбекистон миллий жамоасининг якуний рўйхатидан жой олган футболчилар қаторида дебютант Шерзод Эсанов ҳам борлигини яхши биласиз.
Ўзини ҳақли тарзда бахтли ҳис қилаётган ушбу яримҳимоячи дарҳақиқат сўнгги йилларда катта ўсишга эришди. Легионер сифатида тажрибасини оширишга муваффақ бўлди. Айниқса, унинг Россия Премер-лигасида «Акрон» сафида бир йил мобайнида фаолият олиб боргани ҳам унинг ижобий хислатларини очиб бериш учун хизмат қилди.
Ўша пайтларда «Акрон»га бош мураббийлик қилган Заур Тедеев билан Эсанов борасида тез-тез гаплашиб турардик ва у Эсанов ҳақида илиқ фикрларни билдирарди. Кейинчалик Тедеевнинг ўзи ҳам «Акрон»дан истеъфога чиқди.
Бир йил давомида бизнинг футболчимизга устозлик қилиш орқали унинг савияси ошишига хизмат қилган мутахассис учун собиқ шогирдининг мундиалга йўл олгани жуда қувонарли бўлди.
Қуйида унинг Tribuna.uz журналистига берган интервюсини ўқишингиз мумкин.
- Заур Эдуардович, «Акрон» клуби билан хайрлашганингиздан сўнг ҳали ҳам таътилдамисиз? Режаларингиз қандай?
- Cалом, яхшимисиз. Айни пайтдаги ҳолатим эртанги кун учун режа тузиш имконини бермайди. Ҳозирча бирор-бир жамоадан таклиф олганимча йўқ. Аммо, умид қиламанки, тез орада хизматимга қизиқиш билдирадиган жамоалардан таклифлар бўлади.
- Шерзод Эсанов «Акрон»да қўл остингизда тўп тепган. Энди у Ўзбекистон миллий жамоаси таркибида жаҳон чемпионатида иштирок этади. Бундан хабарингиз борми?
- Ҳа, Шерзоднинг миллий жамоа билан жаҳон чемпионатига йўл олгани мени ёқимли тарзда хурсанд қилди. Бу унинг учун катта плюс. Бугунги кунда Ўзбекистон футболи юксалиш жараёнида. Ҳатто, биз учун ҳам бу қувонали ҳол. Нега деганда, Собиқ Иттифоқ давлатлари орасида фақат Ўзбекистон ушбу жаҳон биринчилигида иштирок этади. Собиқ Иттифоқ даврида ҳам ўзбек футболчилари жисмоний куч-қуввати ва иқтидори баландлиги билан ажралиб туришган. Бугунги кундаги терма жамоа таркибида ҳам ўша авлоднинг муносиб ворислари жамланган. Айниқса, яримҳимоя чизиғидаги ижрочилар ўзларидан яхши таассурот қолдиришяпти. Шерзод учун катта футбол байрамида иштирок қилиш жуда юксак натижа. Ўз навбатида шундай футболчига маълум вақт устозлик қилганим мени ҳам қувонтиради. Мен унга фақат яхши тилаклар билдиришим, омад тилаб қолишим мумкин.
- Эсановнинг потенциалини қандай баҳолайсиз?
- Шерзодни анчадан бери кўрганим йўқ. Қолаверса, ўша клубда ишлаётган пайтимда ярим ҳимоя чизиғида рақобат анча юқори эди. Боз устига бундай ҳолларда ёш футболчилар кўпинча захирада қолиб кетишади. Шерзод «Акрон»да асосан Кубок доирасидаги учрашувларда ўйнарди. Айтишим керакки, шундай баҳсларда Эсанов ўзидан яхши таассурот қолдира оларди. Ўшандаёқ унинг истиқболли футболчи эканлигини ҳис қилардим. Ўйлайманки, анчадан бери уни кўрмаганимга қарамай, Шерзод тажрибасини етарли даражада оширишга улгурган бўлса керак. Мен бунга шубҳа қилмайман. Акс ҳолда уни миллий жамоага чақиришмаган бўларди. Ишончим комилки, Эсанов юқори савияда ўйнай олади. Мен унга жаҳон чемпионатида омад ёр бўлишини тилаб қоламан.
- Шерзод Эсановни жаҳон чемпионатида кўриш сиз учун нимани англатади?
- Яна қайтараман, жаҳон чемпионати улкан футбол форумидир. Унда ҳар кимга ҳам иштирок этиш насиб қилавермайди. Жаҳон биринчилигида энг зўр дея кўрилаётган ўйинчиларгина иштирок этишади. Ўз навбатида бундай байрамда футболчиларда бор маҳоратларини намойиш этиш истаги шунга монанд юқори бўлади. Шубҳа йўқки, жаҳон чемпионати чоғида Шерзод Эсанов ва унинг жамоасига мухлислик қиламан.
- Айтинг-чи, ўзингиз бирга ишлаган яна қайси ўйинчилар миллий жамоалари таркибида жаҳон чемпионатига йўл олишмоқда?
- Премер-лигада ўзим бошқарган клублар таркибида миллий терма жамоаларнинг аъзолари ҳам тўп тепишган. Масалан, Артём Дзюба. Мен учун Дзюба билан бирга ишлаш мураббий сифатида жуда ёқимли бўлган. Ҳаётий таржрибам ошган. Энди эса мана, Шерзод Эсанов жаҳон биринчилигида иштирок этишга ҳозирлик кўрмоқда.
- Ўзбекистон гуруҳда Колумбия, Португалия ва Конго ДР миллий жамоалари билан куч синашади. Жамоамизнинг гуруҳдаги имконияти ҳақида нима деган бўлардингиз?
- Жаҳон чемпионатида иштирок этиш ҳар бир терма жамоа учун ўзига хос имконият. Ўз навбатида бутун Ўзбекистон учун миллий жамоанинг футбол форумида иштирок этиши байрамга айланиши шубҳасиз. Фурсатдан фойдаланиб бундай имконга эга бўлгани учун миллий жамоангизни чин қалбимдан табриклайман. Худо насиб қилиб, бу жаҳон чемпионати Ўзбекистон учун тарихий аҳамият касб этиб қолишидан умидворман. Одатда, жаҳон чемпионатларида кутилмаган натижалар содир бўлади. Истардимки, Ўзбекистон мана шундай сенсацион натижаларни қайд этсин! Имкониятга келсак, гуруҳингиз анча жиддий рақиблардан ташкил топган. Албатта, бундай рақиблар билан беллашиш мураккаб кечади. Лекин ҳаётда кутилмаган воқеалар юз бергани каби футболда ҳам шундай ҳодисалар содир бўлиб туради. Ўзбекистон учун мухлислик қилиб, қайғуриб қоламиз.
- Эсановни клубга таклиф этиш ва кейинчалик у билан хайрлашиш қандай юз берганди?
- Бу саволингизга қисман юқорида жавоб бериб ўтдим. Биз ўшанда ёш, истиқболли ўйинчи тимсолида Эсановни кўрганмиз. Ўзбекистонда футбол анча юқори даражада. Эсанов эса Суперлигада ўйнашга улгурган эди. «Акрон»га олиб келганимдан сўнг машғулотлар чоғида уни танлаб адашмаганимизга амин бўлганмиз. Чунки Шерзодда ўйинни тушуниш, «ўқиш» қобилияти борлиги яққол кўзга ташланиб турарди. Уни «Акрон»дан кетишини умуман истамаганман. Нима сабабдан бундай бўлганини ўзим ҳам тушунмагандим. Футболчини бошқа жамоага ижарага бериб, сўнгра қайтариб олиб келса ҳам бўларди. Бўлган иш бўлиб ўтди. Энди Шерзод Эсанов учун жаҳон чемпионати чоғида мухлислик қиламан, унинг учун қайғураман. Футболчининг фаолиятида кутилмаган даврлар ҳам бўлади. Ўз навбатида Эсанов мана шундай босқичлардан навбати билан ўтиб бормоқда. Ўйлайманки, «Акрон»ни тарк этиш чоғида ўзи тўғри деб билган қарорни қабул қилган. Ўша қабул қилган қарори умид қиламанки, унинг учун яхшиликка бўлган.
