«Манчестер Сити» футболчилари Антуан Семенё ва Марк Геҳи ирқчиликка дуч келди. Клуб расмий баёнот билан бундай ҳолатни кескин қоралади.
Маълум қилинишича, «Эвертон»га қарши баҳс (3:3) вақтида Семенё стадионда ирқчилик мазмунидаги ҳақоратларга учраган. Ушбу ҳолат юзасидан Мерсисайд полицияси 71 ёшли мухлисни қўлга олди.
Кейинчалик у гаров эвазига қўйиб юборилган, бироқ унга қатъий чекловлар қўйилди: эндиликда у ўйинлардан олдин, давомида ва ундан кейин стадионларга яқинлашиши тақиқланган.
Шунингдек, Марк Геҳи ижтимоий тармоқларда ирқчиликка оид ҳақоратомуз хабарлар нишонига айлангани қайд этилди.
«Манчестер Сити» баёнотида шундай дейилади: «Биз Семенё ва Геҳига нисбатан бўлган ирқчиликни кескин қоралаймиз. Футболда бундай ҳолатларга ўрин йўқ. Футболчиларимизни тўлиқ қўллаб-қувватлаймиз».
«Эвертон» ҳам бу борада қатъий позицияни билдирди: «Ирқчилик ва ҳар қандай дискриминация мутлақо қабул қилинмайди. Бундай хатти-ҳаракатлар спортда ҳам, жамиятда ҳам бўлиши мумкин эмас».
Клуб тезкор чоралар кўрилганини ва тергов органлари билан ҳамкорлик давом этишини таъкидлади.
