«Yuventus» va «Beshiktosh» yarimhimoyachi Fabio Miretti transferi bo‘yicha muzokaralarning yakuniy bosqichida. Bu haqda Gazzetta dello Sport xabar berdi.
Turkiya klubi 23 yoshli italiyalik futbolchi bilan shaxsiy shartlarni kelishib oldi va yaqin soatlarda Turin klubiga yakuniy taklif yuborishga tayyorlanmoqda.
Gap Mirettini sotib olish huquqi bilan ijaraga berish haqida ketmoqda. Muayyan shartlar bajarilsa, ushbu band majburiy xaridga aylanishi mumkin. Tomonlarga kelishuvning so‘nggi moliyaviy tafsilotlarini hal qilish qolgan.
«Yuventus» Miretti uchun maosh va amortizatsiya xarajatlarini o‘z zimmasidan chiqarishni istamoqda. Tejalgan mablag‘lar keyingi transferlarga, xususan, Frank Kessieni sotib olishga yo‘naltirilishi mumkin.
Ma’lumot uchun, Miretti o‘tgan mavsumda 31 ta uchrashuvda maydonga tushib, 1 ta gol va 3 ta golli uzatmaga mualliflik qilgan. Transfermarkt futbolchining bozor qiymatini 15 million yevroga baholamoqda.
