«Real» FIFA prezidenti Janni Infantinoning FIFA Forward Enterprise (FFE) loyihasini amalga oshirishdan voz kechish qarorini e'tirof etdi.
Ushbu loyiha jahon chempionatini o'tkazishdan olinadigan tijoriy huquqlardagi ulushlarni xususiy investorlarga sotishni nazarda tutgandi.
«Real» FIFAning o'z musobaqalarini o'tkazish bo'yicha taklif etilgan tijoriy huquqlarni qisman sotishdan voz kechish qarorini e'tirof etadi.
Bizning klubimiz bu qarorni futbol, uning tashkilotlari va eng avvalo, sevimli sport turimizning millionlab muxlislari uchun yaxshi yangilik deb hisoblaydi.
«Real» UEFA, konfederatsiyalar va federatsiyalarga, shuningdek, ushbu loyihaga qat'iy va mas'uliyatli tarzda qarshi chiqqan barcha tashkilotlarga minnatdorchilik bildiradi. Ularning birligi va mas'uliyat hissi hal qiluvchi pallada futbolni himoya qildi.
Klublar — xalqaro musobaqalar va jahon chempionati barpo etiladigan poydevordir. Aynan klublar milliy jamoalarga katta musobaqalarni o'tkazish imkonini beradigan futbolchilarni kashf etadi, tarbiyalaydi, rivojlantiradi va taqdim etadi.
Xalqaro futbol musobaqalari va jahon chempionati, avvalo, jamoatchilik manfaatlariga daxldor bo'lgan voqealar hamda millatlar, muxlislar va butun jamiyatga tegishli merosdir.
Shu bois biz ularga ozchilik manfaati yo'lida savdo qilinadigan oddiy moliyaviy aktivlar sifatida munosabatda bo'lish kerak emas deb hisoblaymiz.
«Real» musobaqalardan kelajakda olinadigan tijoriy daromadlarni ular bilan bog'liq xarajatlar va xatarlarni o'z zimmasiga olmasdan turib sotishga qaratilgan har qanday urinishga qat'iyan qarshi.
Bu yukni aynan klublar ko'tarmoqda. Futboldan kelajakda olinadigan daromadlarni ularni yaratish mas'uliyatini o'z zimmasiga olmasdan turib o'zlashtirishga qaratilgan har qanday tashabbus qabul qilib bo'lmaydi va bunday g'oya boshqa hech qachon ko'rib chiqilmasligi kerak.
Bu «Real» milliy darajada ham izchil amal qilib kelayotgan tamoyildir. Klubimiz La Liga klublarning audiovizual mahsulotlardan kelajakda oladigan daromadlarining bir qismini 50 yil davomida xususiy CVC fondiga investitsiyalar evaziga berish majburiyatini nazarda tutgan bitimga qarshi chiqqan va unda ishtirok etmagan.
Barcha xarajat va xatarlarni yarim asr davomida o'z zimmasiga oladigan klublarga tegishli daromadlarni garovga qo'yish Ispaniya futbolida ham, xalqaro maydonda ham takrorlanmasligi kerak bo'lgan vaziyatni yaratadi», — deyiladi «Real» bayonotida.
