«Реал» FIFA президенти Жанни Инфантинонинг FIFA Forward Enterprise (FFE) лойиҳасини амалга оширишдан воз кечиш қарорини эътироф этди.
Ушбу лойиҳа жаҳон чемпионатини ўтказишдан олинадиган тижорий ҳуқуқлардаги улушларни хусусий инвесторларга сотишни назарда тутганди.
«Реал» FIFAнинг ўз мусобақаларини ўтказиш бўйича таклиф этилган тижорий ҳуқуқларни қисман сотишдан воз кечиш қарорини эътироф этади.
Бизнинг клубимиз бу қарорни футбол, унинг ташкилотлари ва энг аввало, севимли спорт туримизнинг миллионлаб мухлислари учун яхши янгилик деб ҳисоблайди.
«Реал» UEFA, конфедерациялар ва федерацияларга, шунингдек, ушбу лойиҳага қатъий ва масъулиятли тарзда қарши чиққан барча ташкилотларга миннатдорчилик билдиради. Уларнинг бирдамлиги ва масъулият ҳисси ҳал қилувчи паллада футболни ҳимоя қилди.
Клублар — халқаро мусобақалар ва жаҳон чемпионати барпо этиладиган пойдевордир. Айнан клублар миллий жамоаларга катта мусобақаларни ўтказиш имконини берадиган футболчиларни кашф этади, тарбиялайди, ривожлантиради ва тақдим этади.
Халқаро футбол мусобақалари ва жаҳон чемпионати, аввало, жамоатчилик манфаатларига дахлдор бўлган воқеалар ҳамда миллатлар, мухлислар ва бутун жамиятга тегишли меросдир.
Шу боис биз уларга озчилик манфаати йўлида савдо қилинадиган оддий молиявий активлар сифатида муносабатда бўлиш керак эмас деб ҳисоблаймиз.
«Реал» мусобақалардан келажакда олинадиган тижорий даромадларни улар билан боғлиқ харажатлар ва хатарларни ўз зиммасига олмасдан туриб сотишга қаратилган ҳар қандай уринишга қатъиян қарши.
Бу юкни айнан клублар кўтармоқда. Футболдан келажакда олинадиган даромадларни уларни яратиш масъулиятини ўз зиммасига олмасдан туриб ўзлаштиришга қаратилган ҳар қандай ташаббус қабул қилиб бўлмайди ва бундай ғоя бошқа ҳеч қачон кўриб чиқилмаслиги керак.
Бу «Реал» миллий даражада ҳам изчил амал қилиб келаётган тамойилдир. Клубимиз Ла Лига клубларнинг аудиовизуал маҳсулотлардан келажакда оладиган даромадларининг бир қисмини 50 йил давомида хусусий CVC фондига инвестициялар эвазига бериш мажбуриятини назарда тутган битимга қарши чиққан ва унда иштирок этмаган.
Барча харажат ва хатарларни ярим аср давомида ўз зиммасига оладиган клубларга тегишли даромадларни гаровга қўйиш Испания футболида ҳам, халқаро майдонда ҳам такрорланмаслиги керак бўлган вазиятни яратади», — дейилади «Реал» баёнотида.
