«Manchester Siti» va «Arsenal» «Nyukasl» yarimhimoyachisi Sandro Tonali transferiga qiziqish bildirmoqda.
Fabritsio Romano xabariga ko‘ra, «Manchester Siti» hozircha «Nottingem Forest» bilan Elliot Anderson transferi bo‘yicha muzokaralarni davom ettirmoqda. Biroq ingliz klubi futbolchi uchun 116 million yevrodan ortiq mablag‘ talab qilmoqda.
Manbada aytilishicha, agar Anderson transferi amalga oshmasa, Tonali «Manchester Siti» uchun asosiy muqobillardan biriga aylanishi mumkin. Shuningdek, Londonning «Arsenal» klubi ham italiyalik futbolchini kuzatib bormoqda.
Sandro Tonali 2023 yil yozida «Milan»dan «Nyukasl» safiga ko‘chib o‘tgan edi.
O‘tgan mavsum 26 yoshli yarimhimoyachi barcha musobaqalarda 53 ta bahsda maydonga tushib, 3 ta gol va 7 ta golli uzatmaga mualliflik qildi.
Eslatib o‘tamiz, Tonali Italiya milliy jamoasining yetakchi futbolchilaridan biri hisoblanadi.
Ma’lumot uchun, Fabritsio Romanoning ma’lum qilishicha, «Arsenal» ham futbolchining transfer imkoniyatlarini o‘rganmoqda.
