Germaniya futbol ittifoqi (DFB) Yurgen Klopp bilan shartnoma shartlarini kelishib oldi. Bu haqda Sky Sport xabar berdi.
Manbaga ko'ra, germaniyalik mutaxassis Germaniya milliy jamoasining yangi bosh murabbiyiga aylanadi. Tomonlar 2030 yilgacha amal qiladigan shartnoma imzolaydi. Bitim 2030 yilda Marokash, Portugaliya va Ispaniyada bo'lib o'tadigan Jahon chempionatini ham qamrab oladi.
Kloppning tayinlanishi Yulian Nagelsmanning JCH-2026 1/16 finalida Germaniya Paragvayga mag'lub bo'lganidan (1:1, penaltilarda 3:4) so'ng iste'foga chiqish qaroridan keyin amalga oshmoqda.
Qayd etilishicha, DFB, Klopp va uning agenti o'rtasidagi muzokaralarning yakuniy bosqichi juma va shanba kunlari Nyu-Yorkda bo'lib o'tadi.
Shuningdek, Sky Sport ma'lumotiga ko'ra, Kloppning 2025 yil yanvaridan buyon faoliyat yuritib kelayotgan Red Bull tizimidagi global futbol rahbari lavozimidan ketishi masalasi ham hal etilgan. Murabbiy DFB bilan shartnoma imzolagach, uning kompaniyadan ketishi huquqiy jihatdan rasmiylashtiriladi.
