Rossiya milliy jamoasi bosh murabbiyi Valeriy Karpin O‘zbekiston milliy jamoasi ustozi Fabio Kannavaro uning ism-familiyasini eslay olmaganiga munosabat bildirdi.
Avvalroq italiyalik mutaxassis Rossiya milliy jamoasi bosh murabbiyi haqida gapirayotib, uning yaxshi futbolchi bo‘lganini ta’kidlagan, ammo ismi va familiyasini eslay olmagan edi.
Karpin esa bu holatga ortiqcha ahamiyat bermadi.
«Eslay olmagan bo‘lsa, bu men uchun katta ahamiyatga ega emas», — deya rossiyalik mutaxassisning so‘zlarini keltiradi «Sport-Ekspress» nashri.
Eslatib o‘tamiz, O‘zbekiston va Rossiya milliy jamoalari bugun, 12 noyabr kuni Toshkentda o‘rtoqlik uchrashuvida maydonga tushadi.
Bahs Toshkent vaqti bilan soat 20:00 da boshlanishi belgilangan. Ushbu uchrashuvda ikki milliy jamoa bosh murabbiylari o‘zaro to‘qnash keladi.
