Jahon chempionatining 11-kuni futbol maydonidan tashqaridagi voqealar bilan ham e’tiborni tortdi. FIFA prezidenti Janni Infantinoning parvozlari, AQSHdagi jazirama ob-havo, Lamin Yamalning javobi va Eron milliy jamoasi bilan bog‘liq muammolar kunning asosiy mavzulariga aylandi.
Avvalo, Janni Infantino yana e’tibor markazida bo‘ldi. Turnirning dastlabki yetti kunida FIFA prezidenti 10 ta bahsga tashrif buyurgan. U Qatar Airways xususiy samolyotidan foydalangani fonida ekologiya va barqarorlik haqidagi chaqiriqlar yana muhokamalarga sabab bo‘ldi. Greenly tahlilchilarining hisob-kitoblariga ko‘ra, Infantinoning turnir oxirigacha bo‘lgan parvozlari 300 dan 500 tonnagacha karbonat angidrid chiqindisini hosil qilishi mumkin.
AQSHdagi issiq ob-havo ham mundialning muhim mavzularidan biriga aylandi. Mayamida Urugvay va Kabo-Verde muxlislari 30 darajadan yuqori harorat ostida stadionga yo‘l oldi. Namlik tufayli havo deyarli 40 darajadek sezildi. Madridda esa Ispaniya milliy jamoasi bahsining ommaviy namoyishi bekor qilindi. Bunga 39 darajagacha yetishi kutilgan harorat sabab bo‘ldi.
Ispaniya milliy jamoasi Saudiya Arabistonini mag‘lub etgan bahsdan keyin Lamin Yamal ham e’tibor markaziga tushdi. Saudiyalik muxlislarning «Yamal qani?» degan chaqiriqlariga 18 yoshli futbolchi ijtimoiy tarmoqlarda qisqacha «I'm here» («Men shu yerdaman») deb javob qaytardi.
Los-Anjelesda bo‘lib o‘tgan Eron – Belgiya bahsi esa sportdan tashqari omillar bilan ham esda qoldi. Eron milliy jamoasi bosh murabbiyi Amir G‘alenoi turnir davomida jamoa duch kelayotgan logistika muammolari, viza masalalari va uzoq safarlar haqida shikoyat qildi. OAV ma’lumotlariga ko‘ra, Eron futbolchilari Belgiya bilan bahs oldidan 16 soatdan kam mashg‘ulot o‘tkazishga ulgurishgan.
Misr milliy jamoasida esa Muhammad Saloh va bosh murabbiy Hossam Hasan o‘rtasida kelishmovchilik borligi haqidagi gap-so‘zlar rad etildi. Hasan jamoada hech qanday muammo yo‘qligini ta’kidladi. Oradan ko‘p o‘tmay Misr Yangi Zelandiyani 3:1 hisobida mag‘lub etib, Jahon chempionatlari tarixidagi ilk g‘alabasini qo‘lga kiritdi.
Yaponiya muxlislari esa yana bir bor o‘z an’analariga sodiq qoldi. Tunis ustidan qozonilgan 4:0 hisobidagi g‘alabadan so‘ng ular Monterrey stadionidagi tribunalarni tozalab chiqdi. Biroq bu safar Yaponiyaning o‘zida ijtimoiy tarmoqlarda hazilomuz munozara ham boshlandi. Unda «stadionlarni tozalaydigan yapon erkaklari uy ishlariga kam vaqt ajratadi» degan post keng tarqaldi.
Ma’lumot uchun, Jahon chempionati 11 iyundan 19 iyulgacha AQSH, Kanada va Meksikada bo‘lib o‘tmoqda. Turnirda ilk bor 48 ta milliy jamoa ishtirok etmoqda.
