«Tottenhem» hujumchisi Richarlison Braziliyadagi ko‘chmas mulk bo‘yicha nizo markazida qoldi. Bu haqda derbyderbyderby.it nashri xabar berdi.
Ushbu ishda Braziliya sobiq prezidenti Jair Bolsonaroning o‘g‘li, senator Flaviu Bolsonaro ham tilga olinmoqda. Futbolchining ta’kidlashicha, u Rio-de-Janeyro shtati sohilidagi Angra-dus-Reys oroli hududida joylashgan ko‘chmas mulkni sotib olish uchun taxminan 10 million real (1,6–1,8 million yevro) sarmoya kiritgan.
Keyinchalik obyekt ustidan nazoratni yo‘qotganini bildirgan Richarlison vaziyatga oydinlik kiritishni so‘rab, Braziliya Federal politsiyasiga murojaat qilgan. U nizoda Flaviu Bolsonaro va advokat Uiller Tomazning aloqasi bo‘lishi mumkinligini ko‘rsatgan. Biroq senator ushbu mojaroga bevosita aralashganini rad etmoqda.
Richarlisonning aytishicha, ko‘chmas mulkni sotib olish taklifi rad etilganidan keyin obyektga egalik huquqi advokat Uiller Tomaz bilan bog‘liq kompaniyaga o‘tgan. Futbolchi Tomazni Flaviu Bolsonaroning do‘sti deb hisoblaydi.
Richarlison mulk huquqining bunday tarzda o‘tkazilishini qonunga xilof deb hisoblamoqda va voqea tafsilotlarini tegishli organlar tomonidan sinchkovlik bilan tekshirishni so‘ragan.
