«Тоттенҳем» ҳужумчиси Ришарлисон Бразилиядаги кўчмас мулк бўйича низо марказида қолди. Бу ҳақда derbyderbyderby.it нашри хабар берди.
Ушбу ишда Бразилия собиқ президенти Жаир Болсонаронинг ўғли, сенатор Флавиу Болсонару ҳам тилга олинмоқда. Футболчининг таъкидлашича, у Рио-де-Жанейро штати соҳилидаги Ангра-дус-Рейс ороли ҳудудида жойлашган кўчмас мулкни сотиб олиш учун тахминан 10 миллион реал (1,6 - 1,8 миллион евро) сармоя киритган.
Кейинчалик объект устидан назоратни йўқотганини билдирган Ришарлисон вазиятга ойдинлик киритишни сўраб, Бразилия Федерал полициясига мурожаат қилган. У низода Флавиу Болсонару ва адвокат Уиллер Томазнинг алоқаси бўлиши мумкинлигини кўрсатган. Бироқ сенатор ушбу можарога бевосита аралашганини рад этмоқда.
Ришарлисоннинг айтишича, кўчмас мулкни сотиб олиш таклифи рад этилганидан кейин объектга эгалик ҳуқуқи адвокат Уиллер Томаз билан боғлиқ компанияга ўтган. Футболчи Томазни Флавиу Болсонаронинг дўсти деб ҳисоблайди.
Ришарлисон мулк ҳуқуқининг бундай тарзда ўтказилишини қонунга хилоф деб ҳисобламоқда ва воқеа тафсилотларини тегишли органлар томонидан синчковлик билан текширишни сўраган.
