«Ливерпул» собиқ яримҳимоячиси Филиппе Коутинио Юрген Клоппнинг унинг «Барселона»га ўтиш қарорига қандай муносабат билдирганини эслади.
«Баъзан ортга назар ташласам, «Ливерпул»дан кетиб, фаолиятимдаги энг катта хатога йўл қўйганимни ҳис қиламан. Вақт нақадар тез ўтиб кетади…
«Барселона» таклифини қабул қилганимдан сўнг Юрген Клопп қароримдан жуда жаҳли чиқди. Чунки у кетишим ҳақида маълум бўлишидан бир неча ҳафта олдин бу жамоада менга қандай рол ажратилаётганини тушунтирганди.
У машғулотлардаги ҳаракатларимни кузатиб юрарди. Бир машғулотдан кейин ёнимга келиб: «Ҳой, Фил, бир неча ҳафта олдин келаси мавсум режалари ҳақида гаплашганимиздан сўнг қандай қилиб бундай қарорга келдинг?» — деб сўради.
Мен жим қолдим. У эса яна сўради, энди жавоб беришим керак эди. Мен Испанияда янги чақириқни қабул қилмоқчи эканимни айтдим. Балки «Барселона»нинг таклифини рад эта олмагандирман.
Ўша вақтда қолиб, Юрген Клопп билан ишлашни давом эттирмаганимдан афсусдаман. Чунки ҳаммаси мен режалаштиргандек кечмади ва мен истаган совринларни қўлга кирита олмадим», — деди Коутинио.
Эслатиб ўтамиз, «Барселона» 2018 йил қишида Коутиниони «Ливерпул»дан 120 миллион евро эвазига сотиб олганди. Ҳозирда бразилиялик футболчи «Сантос»да тўп тепмоқда.
