Лига 1да 20 йилдан бери кузатилмаган ҳолат содир бўлди

Франция чемпионатининг 7-турида «Париж» клуби «Ренн»ни 4:3 ҳисобида мағлуб этди.

Мухлислар ушбу беллашувда пеналтидан урилган 4 та голнинг гувоҳи бўлишди. Нантлик бош ҳакам Бастиен Дешепи томонидан белгиланган тўртала пеналти ҳам муваффақиятли амалга оширилди. Лига 1да сўнгги 20 йил ичида бир ўйин давомида бунчалик кўп пеналти белгиланиши илк бор кузатилди.

Эътиборлиси, «Ренн»нинг учала тўпи ҳам пеналти зарбалари орқали киритилди. Учала пеналтини ҳам Эстебан Лепол аниқ амалга оширди. У 1992 йил январ ойида «Тулон» сафида «Нанси»га қарши баҳсда пеналтидан ҳет-трик қайд этган Леонардо Родригесдан кейин Франция юқори дивизионида бир ўйинда пеналтидан 3 та гол урган илк футболчига айланди.

Франция чемпионатининг кейинги турида «Париж» 24 октябр куни сафарда «Ланс» меҳмони бўлади. «Ренн» эса ўз майдонида «Страсбург» жамоасини қабул қилади.