Ўзбекистон Профессионал футбол лигаси Ижроия қўмитаси ТерДУ клубини Пролигадан четлаштиришга қарор қилди. Бу ҳақда ташкилот матбуот хизмати хабар берди.
«Аввалроқ ТерДУ клуби кетма-кет икки расмий учрашувда иштирок этмаганидан келиб чиқиб, уни Пролига иштирокчилари сафидан чиқариш масаласи Лига Ижроия қўмитасига киритилганди.
17 октябр куни Ижроия қўмита аъзоларининг онлайн йиғилиши бўлиб ўтди. Кун тартибига киритилган масала юзасидан қўмитанинг 7 нафар аъзоси ТерДУ клубини регламентга мувофиқ мусобақадан четлаштириш лозимлигини қайд этди. Аъзолардан яна бири эса клубга мавсум якунига қадар расмий учрашувларда иштирок этиш учун имконият тақдим этиш таклифини илгари сурди.
Шунингдек, Ижроия қўмитанинг яна бир аъзоси, Ўзбекистон футболчилари уюшмаси раиси ТерДУ клубининг футболчилар олдидаги молиявий мажбуриятларига эътибор қаратди. Қайд этиш керак, аввалроқ футболчилар олдидаги қарздорлик оқибатида Ассоциациянинг тегишли қўмитаси ТерДУ клубига трансфер тақиқи белгилаганди.
Йиғилиш давомида ТерДУ клубининг кейинги расмий учрашувларда иштирок этиши футболчилар олдидаги мажбуриятларни бажариш учун асос бўла олмайди деган қарорга келинди. Боиси, ТерДУ биринчи навбатда уй учрашувларини Термизда ўтказа олмаяпти.
Қолаверса, клуб чипталар сотуви ёки қўшимча ҳомий ташкилотлардан эҳтимолий тушумларга эга эмас. Шундан келиб чиқиб, Камолиддин Мурзоев ҳам ТерДУ клубини мусобақалардан четлаштириш вариантида тўхталди.
Ижроия қўмита аъзоларининг кўпчилик овози билан ТерДУ клубини Пролига мусобақадан четлаштириш бўйича қарор қабул қилинди. Ўзбекистон U-19 чемпионати якунига фақатгина бир тур қолганлиги ва қайд этиладиган эҳтимолий натижадан қатъий назар ТерДУ U-19 жамоаси дастлабки тўртликка кира олмаслиги инобатга олиниб, 2 -октябр куни ўтказилиши режалаштирилган Хоразм U-19 — ТерДУ U-19 учрашуви ҳам бекор қилинди.
Маълумот ўрнида, ТерДУ клуби Лига олдидаги мажбуриятларини тўлиқ бажариш шартида келаси мавсумни Биринчи лига мусобақада ўтказиш имкониятига эга», — дейилади хабарда.
