Superliga 20-turida «So‘g‘diyona» o‘z maydonida «Mash’al»ni 5:2 hisobida mag‘lub etdi. Bahsdan so‘ng jamoa bosh murabbiyi Ulug‘bek Baqoyev matbuot anjumanida ishtirok etdi.
«Biz bugungi bahs strategik jihatdan juda muhim ekanini bilardik. Yigitlarni faqat g‘alabaga tayyorlagan edik. Tezkor gol urdik, keyin esa taxminan 20 daqiqa davomida «Mash’al» o‘yinga to‘liq kirishib, agressiv harakat qildi va ko‘plab xavfli vaziyatlar yaratdi. Nazarimda, ular 3–4 ta gol ham urishi mumkin edi. Biroq himoyada yigitlar vazifasini uddaladi, darvozabon ham ajoyib o‘ynadi. Umuman olganda, bugungi g‘alabaga to‘la loyiq edik», — dedi Baqoyev.
Mutaxassis yirik hisob qayd etilishini oldindan bashorat qilish qiyin ekanini ta’kidladi.
«Bunday o‘yinni hech qachon oldindan bashorat qila olmaysiz. Futbol oldindan aytib bo‘lmaydigan o‘yin. Shu bois yaratilgan vaziyatlarning aksariyatidan unumli foydalanganimiz ham hujumda, ham himoyada o‘yinimizni ancha yengillashtirdi», — deya qo‘shimcha qildi Baqoyev.
