«Динамо» клуби ўз уйида «Қизилқум»га қарши бўлиб ўтган баҳсда ягона гол эвазига муҳим уч очкони қўлга киритди. Қийин ўтган баҳсдан кейин самарқандликлар устози Вадим Абрамов матбуот анжуманида иштирок этди.
— Аввало, ғалаба билан табриклаймиз! Ўйин жуда оғир кечди ва жамоа учун муҳим ғалаба қўлга киритилди. Бугунги учрашув ҳақидаги фикрларингиз?
— Ҳа, раҳмат. Ўзингиз ҳам кўрдингиз, ғалаба қозониш осон бўлмади. Рақиб муносиб ўйин кўрсатди, жуда яхши ҳаракат қилди. Аслида, бугун шундай қийин бўлишини кутгандик. Чунки таркибимиздаги бир қатор футболчиларнинг йўқлиги биз учун муаммо туғдирмоқда. Шунинг учун йигитларга алоҳида миннатдорлик билдириш керак. Улар шундай ўйинни охиригача етказиб, ғалабани қўлга кирита олди. Учрашувда ҳиссиётлар жуда юқори бўлди, гоҳ у томонга, гоҳ бу томонга оғиб турган «валидолли» ўйин кечди.
Менимча, биринчи бўлимдан кейин, айниқса иккинчи таймда устунлик биз томонда бўлди. Энг муҳими, яратган имкониятимизни голга айлантира олдик. Умуман олганда, иккинчи бўлимда ғалабага биз яқинроқ бўлдик, деб ўйлайман. Шунинг учун бугунги ғалаба қандай бўлса, шундайлигича қабул қиламиз.
— Жамоага Ҳожимирзаев ва Абдураҳмонов жуда етишмаяпти. Ўзбекистон футбол федерацияси билан келишиб, Абдураҳмоновнинг бугунги учрашувда майдонга тушишини таъминлашнинг имкони бўлмадими? Масалан, бугун Хитойга қарши ўртоқлик учрашуви бўлмоқда ва у захира ўриндиғида ўтирибди. У ахир «дубль» футболчиси эмас, унинг асосий таркиб ўйинчиси экани аллақачон исботланган.
— Бу саволга аниқ жавоб бериш қийин. Барибир бу масала терма жамоа бош мураббийига боғлиқ. Уларнинг ҳам ўз вазифалари бор ва бу устувор ҳисобланади. Мен аввал ҳам айтганман: бизнинг вазифамиз — терма жамоа учун футболчилар тайёрлаш. Албатта, бошқа томондан қараганда, уни бугун бизга қўшиб бериш мумкин эди. Лекин тасаввур қилинг, у бугун ўйнаганида жароҳат олса-чи? Мен бу ҳолатни тушунаман. Чунки ўзим ҳам мураббийлик фаолиятимда шундай вазиятларга дуч келганман. Шунинг учун бу масалада аниқ бир нарса дейиш қийин. Албатта, у биз билан бўлганида, бизга анча осон бўларди.
- Стадион маъмурияти «Динамо» жамоасига машғулот учун майдонни бермаяптими?
— Майдон масаласида футболчиларга шароит яратилмаяпти, деган гап нотўғри бўлади. Чунки бу газонни айнан шу тарзда сақлаб қолишимизга ўзимиз ҳам ҳисса қўшяпмиз. Биз бу ерда кўп машғулот ўтказмаймиз. Масалан, Фарғона жамоаси бу ерда ўйиндан олдинги машғулотини ўтказган. Улар бор-йўғи ярим соат машғулот қилишган, аммо нима учундир жарима майдони ичига кириб, ўша жойни анча бузиб кетишган. Бу ҳолатнинг таъсири ҳозиргача сезилиб турибди. Майдон ҳали тўлиқ тикланмаган.
Юқоридан қараганда, тўп тепилганда чимларнинг учиб кетaётганини ўзингиз ҳам кўряпсиз. Агар биз бу ерда мунтазам машғулот ўтказсак, бундай газон, албатта, қолмайди. Шунинг учун айтаман: бу газон жуда нозик.
— Тўй масаласига келсак…
— Бу ҳақда изоҳсиз қолдираман, тушуняпсизми? Илгари «Крокодил» журнали бўларди, ҳозир у йўқ. Балки тез орада яна пайдо бўлар. Шунинг учун... Яхшиси, тез орада тўйлар ўтказиладиган жойга тўп билан кириб, нормал футбол ўйнаймиз. У ерда ҳам майдон квадрат шаклида бўлади.
Биласизми, бугун бир қизиқ фактга дуч келдим. Маълум бўлишича, бугун 6500 дан ортиқ чипта сотилган. Мен ҳам бундан ҳайрон қолдим. Чунки аввал стадионга 3500 нафар атрофида мухлис кириши айтилган эди. Ҳолбуки, стадионимизнинг сиғими...
Мен билмайман, балки чиптасиз кирганлар ҳам бўлгандир. Лекин бу қандай қилиб мумкин бўлганини тушунмадим.
— «Навбаҳор»га қарши ўйинда жароҳат олган футболчилардан кимдир сафга қайтиши мумкинми?
— Албатта, умид қиламиз. Балки қандайдир мўъжиза рўй бериб, кимдир сафга қайтар. Кўрамиз. Ҳозирча аниқ бир нарса дейиш қийин.
— Иккинчи таймга назар ташласак, жамоа иккинчи бўлимда анча қўшди. Сизнингча, нима ўзгарди? Шунингдек, ўйин давомида амалга оширилган икки алмаштириш ўз вақтида бўлдими? Масалан, шартли равишда, Тўхтасинов жамоа олдинга ўтаётган пайтда майдонга тушди. Нима учун?
— Тўхтасинов жароҳат билан ўйнаяпти. Бу жароҳат унга тўлиқ куч билан ҳаракат қилиш имконини бермаяпти. Ҳозир таркиб билан боғлиқ муаммоларимиз борлиги учун уни эҳтиёт қиляпмиз. Шу сабабли у жамоага жуда қийин бўлиб қолган пайтда майдонга тушяпти.
Унинг жароҳати уч ойдан бери безовта қиляпти. Шунга қарамай, у шу жароҳат билан машғулот ўтказиб, ўйинларда ҳам қатнашяпти. Шу билан боғлиқ муаммолар бор. Иккинчи таймга келадиган бўлсак, биз қайта тузилдик, футболчиларнинг позицияларини ўзгартирдик. Ўзингиз ҳам кўрдингиз — тўп назорати биз томонга ўтди ва аста-секин устунлик қила бошладик. Тўпни рақиб ярим майдонига кўпроқ ўтказдик, шошилмадик ва ҳужумларни якуний зарбагача етказишга ҳаракат қилдик. Натижада гол урдик.
— Тигран Аванесян биринчи марта асосий таркибда майдонга тушди ва танаффусдан кейин дарҳол алмаштирилди? Илгари бундай ҳолат бўлмаган эди.
— Бу унинг ўйнаган позицияси билан боғлиқ. У ерда футболчидан фаолроқ ва жасурроқ ҳаракат қилиш талаб этиларди. У эса бироз камтарлик қилди, эҳтиёткор ўйнади. Шу сабабли уни алмаштирдик. Менимча, аста-секин мослашиб кетади. У — малакали футболчи ва биз унга жуда катта умид боғлаяпмиз. Янги чемпионатга мослашиш жараёни кетяпти ва бу умуман олганда, нормал ҳолат.
Масалан, аввал худди шу Думбия ҳам унчалик яхши кўринмаган эди. Бугун эса ўзини анча жозибали намоён қилди. Улар Ўзбекистон чемпионатига мослашиб боришяпти. Бунинг учун барибир вақт керак. Шунинг учун кейинги турга келиб, янада яхши ўйнайди, деб умид қиламан.
— Сиз айтганингиздек, жамоага ҳали янги футболчилар қўшилгани йўқ, аммо мавжуд барча ресурслардан фойдаланяпсизлар. Бир нечта футболчи алмаштирилди, деярли барча ўйинчилар майдонга тушмоқда. Ҳатто захирада «жокер»лар ҳам қолмаяпти, жароҳатланган футболчилар жуда кўп. Намангaнда қийин бўлади, шундайми?
— Наманганда ҳамма футболчиларимиз соғ бўлганида ҳам қийин бўларди. Шунинг учун рақибни ҳурмат қиламиз ва ўйинга тайёрланамиз. Ҳар бир жамоа рақиб унга қанча имкон берса, шунча ўйнайди. Ҳозир чемпионатда ўйинлар сони кўп, майдонлар, жароҳатлар... Шунинг учун ҳар қандай ҳолат юз бериши мумкин. Билмадим, кўрамиз. Ҳар ҳолда менда ҳеч қандай хавотир йўқ. Ҳозирдан бошлаб яна жароҳат олганлар кўпаймаса, камида кимларга таяна олишимизни биламиз.
— Ўрозовни жамоа учун йўқотиш, десак бўлади. У жамоани кучайтириши мумкин эди, тўғрими?
— У албатта ажойиб футболчи ва йўқлигини билинади. Биласизми, бу йил бизда шундай вазият юзага келди. Мавсумни унчалик омадли бошлай олмадик. Албатта, энди медаллар ва Кубок учун курашга қўшилишимиз қийин. Шунинг учун биз бир футболчига йўл бердик. Унинг катта келажаги бор, деб умид қиламиз. Агар биз ҳам унинг ривожига қандайдир ҳисса қўша олган бўлсак, бунинг ўзи яхши.
У ривожлансин, Россияда Ўзбекистон футболи шарафини муносиб ҳимоя қилсин ва бошқа йигитларимиз ҳам унга эргашсин. Менимча, бу ўзбек футболи учун фойдали бўлади. Биз футболчимиз Россияда муносиб кўриниш бераётганидан фахрланамиз. Сўнгги ўйинлари ва у ҳақидаги фикрларга қараганда, у ердаги энг ёмон легионерлар қаторида эмас, деб ўйлайман.
— Уни тўлиқ сотиб олишлари мумкинми? Қандайдир музокаралар кетяптими? Ҳаммаси тўлиқ трансфер масаласига бориб тақаляптими?
— Вазият шундай бўлдики, дастлаб футболчининг агентлари музокара жараёнини чўзиб юборишди. Чунки унинг қаерга кетиши ҳақида турли гаплар бўлди: Англия, Ирландия, Европанинг бошқа давлатлари, Германия...
Шундан кейин «Рубин» ҳам кутиб ўтирмади ва табиийки, ушбу позиция учун бошқа футболчи излай бошлади. Жараён бироз чўзилди. Кейин эса яна Ўрозов вариантига қайтишди. Бу пайтга келиб, шартлар ҳам ўзгариб бўлган эди. Натижада улар уни кейинчалик сотиб олиш ҳуқуқи билан ижарага олишди. Агар у белгиланган миқдорда ўйинларда майдонга тушса... Менимча, ҳозир биз учун унинг қайтиши ҳатто фойдалироқ бўлар эди. Лекин табиийки, улар малакали футболчини қўлга киритишди.
— Демак, шартномада уларнинг футболчини белгиланган сумма эвазига тўлиқ сотиб олиш ҳуқуқи бор, шундайми?
— Ҳа, албатта», - дея Абрамовнинг сўзларини келтиради Tribuna.uz мухбири.
