Сергей Токов: «Рақиб жуда яхши ҳимояланди»

«Хоразм» клуби ўз майдонида «Сўғдиёна»ни қабул қилди ва ҳужумкор ўтган беллашувда дарвозалар дахлсиз қолди – 0:0.

Ўйиндан сўнг мезбонлар бош мураббийи Сергей Токов матбуот анжуманида фикрлари билан ўртоқлашди.

- Оғир ўйин бўлди. Нима таъсир қилганини билмайман, аммо иккинчи бўлимда барча вазиятларда жипс ҳаракат қилдик, устунлик қилдик, ўйнадик, ғалабани хоҳладик. Бунга нисбатан эътирозим йўқ — йигитлар ўйнашди, ҳаракат қилишди. Фақат омад етишмади, чунки рақиб оммавий тарзда ҳимояга ўтирди. Рақиб жуда яхши ҳимояланди, улар ҳам беш нафар ҳимоячи билан ўйнашди. Бу — футбол, нима ҳам дердик.

— Бугунги ўйин учун қандай режа ишлаб чиқилган эди? Нималарни режалаштирган эдингиз?

— Бугунги режами? Умуман олганда, тайёрлаган режамизнинг кўп жиҳатлари амалга ошди, фақат вазиятларни якунлаш етишмади. Бизга якунловчи ҳаракатлар бироз етишмаяпти. Балки ҳужум чизиғида етишмовчилик бордир — буни аввал ҳам айтганман. Масалани ҳал қила оладиган, ўйинни ўз қўлига олиб, ҳал қилувчи қарор қабул қиладиган футболчилар етишмаяпти. Яъни, вазиятларда совуққонлик билан ҳаракат қилишимиз керак. Ҳозир эса ҳар доим ҳам футболчиларни қўшимча жалб қилиш имконияти йўқ. Бор футболчилар билан ишлаймиз, уларни ўргатамиз ва кейинги ўйинда ғалаба қозониб, мухлисларни хурсанд қилишга ҳаракат қиламиз.

— Менга энг ёққан жиҳати — бизнинг жамоамиз яхшироқ ўйнади. Менинг фикримча, умуман олганда, ёмон ўйнамадик. Жуда кўп ҳужум қилдик. Чуқур ҳимояланаётган жамоага қарши ўйнаш жуда қийин, чунки бўш ҳудуд қолмайди. Рақиб жамоа ҳам тажрибали, футболчилари ҳам яхши жамоаларда ўйнашган. Улар айниқса ҳимояда жуда яхши ҳаракат қилишди. Ҳаммаси интизомли тарзда эди. Шунинг учун ўйин қийин кечди.

— Биз ғалаба қозонишни хоҳладик, ҳаракат қилдик. Умуман олганда, ягона камчилик — яратган вазиятларимизни гол билан якунлай олмадик. Йигитларга нисбатан эса катта эътирозим йўқ», - дея Токовнинг сўзларини келтиради Tribuna.uz журналисти.