Улуғбек Бақоев: «Ўйин дурангга мос бўлди»

Суперлиганинг 21-туридан ўрин олган «Хоразм» ва «Сўғдиёна» ўртасидаги беллашувда ҳисоб очилгани йўқ.

Ўйиндан кейин жиззахликлар бош мураббийи Улуғбек Бақоев қуйидагиларни айтди:

- Биринчи муаммо бу сунъий қопламали майдон билан боғлиқ эди. Табиий майдондан сунъий майдонга ўтиб ўйнаш осон эмас. Шу ҳолат бўйича бироз хавотирда эдик. Аммо ўзимиз учун қўрқмасдан, ўйинга аниқ режа билан чиқдик. Биринчи таймда ташаббус мезбонлар тарафида бўлди. Шунга яраша, улар тўпни назорат қилишди ва хавфли ҳужумлар содир этдилар.

Албатта, биз ҳам вазиятларни яратишга ҳаракат қилдик. Лекин барчаси ҳам кўнгилдагидек бўлгани йўқ.

Иккинчи бўлимга келиб ўйинимиз анча кучайди ва ҳужумкор ўйнай бошладик. Ўйинимиз аста-секин жонланди, тобора яхшироқ кўриниш олди. Бунинг учун керакли ўзгаришларни ҳам амалга оширдик. Ўйлашимча, беллашув дурангга мос бўлди.

Иккала жамоа ғалаба учун ҳаракат қилди, якунда эса бир очкодан. Умумий қилиб оладиган бўлсак, жамоалар дурангга лойиқ ҳаракат қилишди. Албатта, футболчиларимга борларини бериб тўп тепишгани учун миннатдорчилик билдираман ва «Хоразм» жамоасига омад тилайман», - дея Бақоевнинг сўзларини келтиради Tribuna.uz мухбири.