Суперлига 25-турида «Сурхон» меҳмонда «Бухоро» билан беллашди. Унда жамоалар 0:0 ҳисобидаги дурангга рози бўлишди. Беллашувдан сўнг термизликлар яримҳимоячиси Суннатулла Абдуллажонов Tribuna.uz мухбири билан суҳбатлашди.
- Аввало «Бухоро»га қарши ўйиндан кейинги таассуротларингиз қандай?
- Албатта ўйиндан кейин таассуротларим жуда ҳам зўр эмас. Чунки «Бухоро» бир киши кам бўлиб қолган эди. Ғалаба қозонишимиз мумкин эди. Лекин бухороликлар майдонида очко олиш қийинлигини ҳамма яхши билади. Улар жиддий курашди. Буни ҳисобдан ҳам билиш мумкин.
- Рақиб 10 киши бўлиб қолди. Термизликларга бундан унумли фойдаланиб, ғалаба қозониб кетишига нима етишмади?
- Менимча қизил карточкадан кейин бизга бироз совуққонлик етишмади. Ўйин бошидан ўзимиз истаган футболни намойиш этишга қийналдик. Рақиб ҳам яхши қаршилик кўрсатди. Қолаверса, майдон ҳолати ҳам бунга таъсир қилди. Шу жиҳатлар ҳам ўзимиз истаган футболни намойиш этишга бироз тўсиқ бўлди деб айта оламан.
- «Сурхон» қаторасига учта баҳсдан бери гол ура олмаяпти. Бу ташвишга солмаяптими?
- Албатта, гол ура олмаётганимиз бизни кўпроқ ўйлашга мажбур қилмоқда. Қолаверса, муҳим бўлган учкога эриша олмадик. Такрор айтаман, айрим вазиятларда биз устун келдик, ташаббусга эга бўлдик. Бироқ якуний нуқтани қўйиш вақтида совуққонлик етишмади. Шунга қарамай, машғулотларда вазиятларни якунлаш бўйича кўпроқ ишлаяпмиз. Ишонаманки, келгуси баҳсларда бу камчиликларни бартараф этиб, голлар уришни бошлаймиз.
- Сизнингча, жамоанинг лигада қолиш имконияти қандай?
- Бу борада бизда иккиланиш йўқ. Лигада қолишимизга ишончим комил. Ҳаммаси ўз қўлимизда. Қолган беллашувларда керакли натижаларга эришсак, вазифани уддасидан чиқамиз. Йўқотадиган нарсамиз қолмаган. Қолган баҳсларда фақат ғалаба ва керакли натижалар учун чиқамиз ва жамоани лигада қолишини кафотламоқчимиз.
- Кейинги 5 та турдаги рақиблар ҳақида фикрингиз қандай?
- Тақвимдан келиб чиқсак, қолган турлар янада қийин бўлиши аниқ. Чунки мавсум якунланиб борган сари ҳаммага очко жуда зарур. Биз эса ҳар бир рақибга қарши муносиб тайёргарлик кўрамиз. Осонликча таслим бўлмаймиз. Рақиб ким бўлишидан қатъий назар, охиригача курашамиз.
- Умуман олганда «Сурхон»нинг кўрсатаётган ўйинлари сизда қандай таассурот қолдирмоқда?
- Аслида биз ёмон иштирок этмаяпмиз. Кўп ўйинларда тўп назоратини яхши сақлаймиз, ташаббусга эга бўламиз. Тўғри, камчиликларимиз бор. Лекин буни устида ишлаяпмиз. Агар хатоларимиздан керакли хулоса қилсак ва ўз ўйинимизни ташкил қилиб олсак, ҳозирги эгаллаб турган ўрнимиздан анча юқорида бўлишимиз аниқ.
