Ўзбекистон кубоги. Яримфинал санаси ва стадионлари эълон қилинди

ПФЛ Ўзбекистон кубоги яримфиналларининг санаси ва ўйинлар бўлиб ўтадиган стадионларни маълум қилди.

«Ўзбекистон кубогининг яримфинал ва финал учрашувлари марказлаштирилган тизимда ўтказилиши лозим эди. Май ойидаги танаффус сабаб Лига шу ойга режа қилинган Суперлиганинг 4 та ҳамда кубок 1/8 финал босқичи учрашувларини мавсумнинг иккинчи ярмига кўчиришга мажбур бўлди. Мамлакатнинг уч клуби халқаро майдонда иштирок этаётгани ҳамда куз фаслидаги FIFA кунлари тақвимни зич ҳолатга келтирди. Марказлаштирилган яримфинал ва финал бўйича қарор қабул қилинаётганда мазкур босқичга етиб келиши мумкин бўлган республиканинг барча клублари манфаати инобатга олинган бўлиб, пойтахт логистика маркази эканлиги, қолаверса, Тошкент финал остонасига қадар етиб келиши мумкин бўлган барча жамоалар учун марказлиги қайд этилганди. Қолаверса, 2020 йилдан буён кубокнинг финал учрашувлари кетма кетликда вилоятларда ўтказилди: Наманган (2020), Самарқанд (2021), Бухоро (2022), Қарши (2023), Фарғона (2024), Андижон (2025). Шундан келиб чиқиб, 2026 йилги ҳал қилувчи уч учрашув Тошкентда ўтказилиши ва учрашувлар оралиғи уч кунни ташкил этиши бўйича барча клублар билан келишувга эришилганди.

Эндиликда, халқаро майдонда иштирок этаётган уч клубнинг мусобақа билан хайрлашгани тақвимда қўшимча кунлар тақдим этади. 1/8 финал босқичида «Пахтакор» ва «Насаф» мусобақадан чиқиб кетган бўлса, «Нефтчи» ўз юришини 1/4 финалда тўхтатди. Яримфиналга қадар етиб келган клублар эса юқоридаги уч жамоа халқаро мусобақада иштирок этаётган даврда Ўзбекистон кубогининг финал учрашуви учун кураш олиб бориш имкониятига эга бўлади.Шундан келиб чиқиб, Лига 1/2 финалга қадар етиб келган клублар билан учрашув ўтказди. Унда ноябр ойидаги FIFA кунларидан кейинги тақвим масаласида фикр алмашилди ҳамда финалгача бўлган икки учрашув 24 ноябрда ўтказилиши белгилаб олинди.

Мусобақа регламенти ва унинг саналари тасдиқланаётган бир вақтда Тошкент стадионлар сони ва сифати бўйича яхши ҳолатда эди. Бироқ кейинчалик «Бунёдкор», «Жар» ва «Олимпия» каби стадионлар майдони таъмирлаш учун ёпилди. «Пахтакор» стадионида эса қолган трибуналарни таъмирлаш ишлари давом этмоқда. Шуни инобатга олиб, Лига 1/4 финал олдидан марказлаштирилган босқични водийда ўтказиш эҳтимоли юзасидан фикр алмашилди. Жумладан, Намангандаги «Марказий» стадион финални қабул қилиши ишчи режа сифатида киритилган бўлиб, яримфинал учрашувлари Фарғона ва Наманган шаҳарларида ўтказилиши мумкин эди. Бунинг ягона шарти — яримфиналга қадар етиб келган барча жамоалар мазкур масалага розилик билдириши эди. «Андижон», ОКМК ва «Локомотив» клублари эса барча масала аввалдан белгилангани бўйича қолишига овоз берди.Шу тариқа Лига 24 ноябр кунга режалаштирилган «Андижон» — «Локомотив» учрашувини ОКМК стадионида, ОКМК — «Навбаҳор» учрашувини эса «Локомотив» стадионида ўтказишга қарор қилди. Клублар билан келишувга кўра, финалга Тошкент клублари йўл олса, ҳал қилувчи беллашув Тошкентда бўлиб ўтади. Финалда водий қарама-қаршилиги кузатилса, у ҳолда учрашувга Фарғонадаги «Истиқлол» стадиони мезбонлик қилади.

Изоҳ. Финал санаси яримфинал учрашувларидан кейин эълон қилинади. Яримфиналга қадар етиб келган клублар орасидан «Андижон» Суперлиганинг плей-офф босқичига қолиб кетмаслик масаласини тўла ҳал қилиб улгурмаган. Шундан келиб чиқиб, финал санасига кейинроқ ойдинлик киритилади. «Андижон»нинг плей-оффда иштирок этмаслиги аниқ бўлса ёки клуб финал чиптасига эга чиқолмаса, кубок финали режадагидан эртароқ ўтказилади», — дейилади хабарда.