Ўзбекистон кубоги чоракфинал босқичида «Нефтчи» Фарғонада «Локомотив»ни қабул қилди. Қизиқарли ва голларга бой ўтган учрашувда меҳмонлар 4:2 ҳисобида ишончли ғалабани қўлга киритди ва яримфинал йўлланмасига эга чиқди.
Учрашувдан кейин «темирйўлчилар» устози Мирко Еличич матбуот анжуманида қатнашди.
— Бу ҳақиқий кубок баҳси бўлди. Голлар кўп, жамоадаги кайфият ҳам аъло даражада. «Нефтчи» охиригача яхши курашди. Ўйин давомида вазиятлар у ёқдан, бу ёққа ўзгариб турди. Айрим вазиятларда тўп дарвозага кирди, айримларида эса кирмади.
Лекин футболдан нолишга ҳам ўрин йўқ. Ҳар икки жамоа охиригача курашди ва ҳақиқий футбол намойиш этди. Бизнинг йигитлар ҳам қойилқоларли ҳаракат қилишди, яхши ўйин қуришга ва охиригача курашишга муваффақ бўлишди.
Жуда қизиқарли ўйин бўлди. Бу қандай ажойиб кубок баҳси бўлди-аа!? Томоша қилиш ҳам, майдонда ўйнаш ҳам ёқимли эди.
— Кўпчилик «Локомотив»нинг бугунги натижага эришишига ишонмаган, бундай натижани кутмаган эди. Жамоа бугунги ғалабага қандай эришди? Бунинг сири нимада?
— Биз футболни ўзимизга қулай услубда ўйнаймиз. Футболчиларимиз ҳам шу услубда ҳаракат қилишга ўрганишган. Бу — 10 ойлик меҳнат жараёнининг натижаси.
Энг муҳими, футболчиларимиз майдонда ўйнашдан қўрқишмайди. Агар ўйнашдан қўрқмасангиз, жуда кучли рақибларга қарши ҳам яхши ўйнай оласиз. Аксинча, ўйнашдан қўрқсангиз, фақат курашнинг ўзи етарли бўлмай қолади.
Мен учун «Нефтчи» каби жамоаларнинг даражаси юқори. Уларнинг футболчилари жуда сифатли. Бугун эса ўз ўйинимизга бўлган ишончимиз катта аҳамият касб этди», - дея Еличичнинг сўзларини келтиради Tribuna.uz мухбири.
