Аргентина миллий жамоаси бош мураббийи Лионел Скалони Бенин билан бўладиган баҳс олдидан фикр билдирди. Мазкур беллашув 39 ёшли Лионел Месси учун миллий жамоадаги сўнгги ўйин бўлиши кутилмоқда. Скалони «Монументал» стадионидаги хайрлашув катта қизиқиш уйғотишини таъкидлади. Бу ҳақда TyC Sports хабар берди.
«Агар «Монументал» каби бешта стадион бўлганида ҳам, уларнинг барчаси тўларди. Менимча, шу билан ҳаммаси айтилган. Энди бу лаҳзадан завқланиш ва биз доимо гапирган носталжияни ҳис қилиш қолади. Бир кун келиб у биз билан бўлмайди, мана шу вақт ҳам етиб келди», — деди Скалони.
Аргентина миллий жамоаси устози Мессининг жамоадаги ўрни нафақат майдондаги ўйини, балки кундалик муносабати билан ҳам алоҳида эканини қайд этди. Унинг сўзларига кўра, футболчининг жамоага бўлган муносабати жамоадошлари учун энг яхши намуна бўлиб хизмат қилган.
«Унинг мероси — доимо жамоа ёнида бўлиш истаги. У биринчи бўлиб келарди ва охирги бўлиб кетарди. Ўзига қандай қараши, ҳар бир баҳсга қандай ёндашиши — булар ташқаридан кўринмайдиган жиҳатлар, аммо жамоадошлари буни сезади. Бу энг яхши намуна. У ўзидан тенгсиз мерос қолдирмоқда», — деди аргентиналик мутахассис.
Эслатиб ўтамиз, Аргентина 7 октабр куни ўртоқлик баҳсида Бенин билан беллашади. Беллашув Лионел Месси учун миллий жамоадаги сўнгги ўйин сифатида тарихга кириши кутилмоқда.
Маълумот учун, Месси Аргентина миллий жамоаси сафида жаҳон чемпионати, Америка кубоги ва бошқа йирик турнирларда ғалаба қозонган. У жамоа тарихидаги энг сермаҳсул футболчи ҳисобланади.
