Argentina milliy jamoasi bosh murabbiyi Lionel Skaloni Benin bilan bo‘ladigan bahs oldidan fikr bildirdi. Mazkur bellashuv 39 yoshli Lionel Messi uchun milliy jamoadagi so‘nggi o‘yin bo‘lishi kutilmoqda. Skaloni «Monumental» stadionidagi xayrlashuv katta qiziqish uyg‘otishini ta’kidladi. Bu haqda TyC Sports xabar berdi.
«Agar «Monumental» kabi beshta stadion bo‘lganida ham, ularning barchasi to‘lardi. Menimcha, shu bilan hammasi aytilgan. Endi bu lahzadan zavqlanish va biz doimo gapirgan nostaljiyani his qilish qoladi. Bir kun kelib u biz bilan bo‘lmaydi, mana shu vaqt ham yetib keldi», — dedi Skaloni.
Argentina milliy jamoasi ustozi Messining jamoadagi o‘rni nafaqat maydondagi o‘yini, balki kundalik munosabati bilan ham alohida ekanini qayd etdi. Uning so‘zlariga ko‘ra, futbolchining jamoaga bo‘lgan munosabati jamoadoshlari uchun eng yaxshi namuna bo‘lib xizmat qilgan.
«Uning merosi — doimo jamoa yonida bo‘lish istagi. U birinchi bo‘lib kelardi va oxirgi bo‘lib ketardi. O‘ziga qanday qarashi, har bir bahsga qanday yondashishi — bular tashqaridan ko‘rinmaydigan jihatlar, ammo jamoadoshlari buni sezadi. Bu eng yaxshi namuna. U o‘zidan tengsiz meros qoldirmoqda», — dedi argentinalik mutaxassis.
Eslatib o‘tamiz, Argentina 7-oktabr kuni o‘rtoqlik bahsida Benin bilan bellashadi. Bellashuv Lionel Messi uchun milliy jamoadagi so‘nggi o‘yin sifatida tarixga kirishi kutilmoqda.
Ma’lumot uchun, Messi Argentina milliy jamoasi safida jahon chempionati, Amerika kubogi va boshqa yirik turnirlarda g‘alaba qozongan. U terma jamoa tarixidagi eng sermahsul futbolchi hisoblanadi.
