Аргентина миллий жамоаси дарвозабони Эмилиано Мартинес 39 ёшли ҳужумчи Лионел Мессининг миллий жамоадаги фаолиятини якунлаши ҳақида гапирди. Футболчи жамоадоши билан бирга майдонда қолган қисқа вақтни қадрлашини таъкидлади.
«Албатта, мен унга қўлимдан келганича ёрдам беришга ҳаракат қилдим, у буни билади. Биз бу ҳақда доимо гаплашамиз. Мен Лео ўзи энг кўп истаган нарсага эришишида унга ёрдам берганимдан жуда катта шараф ҳис қиламан, чунки у тарихдаги энг буюк футболчи», — деди Мартинес.
Дарвозабон Мессининг Аргентина миллий жамоасидан кетиши жамоада катта бўшлиқ қолдиришини қайд этди. Шу билан бирга, у жамоада катта характерга эга футболчилар борлигини таъкидлади.
«У кетганидан кейин улкан бўшлиқ қолади, бироқ бу ерда ҳақиқий характерга эга йигитлар бор. Мен ҳам бу жараённинг бир қисми эканимни ҳис қиляпман. Сешанба куни бундан завқ олишни ва унинг табассумини кўришни истайман», — дея Мартинеснинг сўзларини ESPN Argentinа келтирди.
Месси Аргентина миллий жамоаси сафидаги сўнгги баҳсини 7 октабр куни Бенин билан ўтказиши кутилмоқда. Мартинес жамоадошлари билан бирга афсонавий футболчининг майдондаги сўнгги дақиқаларини имкон қадар ҳимоя қилишга ҳаракат қилишини айтди.
«Биз Лео билан майдонда бирга қоладиган қисқа вақтимиз давомида уни асрашга ҳаракат қиламиз», — деди Аргентина миллий жамоаси дарвозабони.
Эслатиб ўтамиз, Месси Аргентина билан 2021 йилда Америка Кубоги, 2022 йилда Жаҳон чемпионати ва 2024 йилда яна Америка Кубогида ғолиб чиққан.
Telegram’да биринчи бўлиб фикр билдиринг
Муҳокамага ўтишИзоҳлар Telegram’да очилади