«Ванкувер Уайткапс» яримҳимоячиси Томас Мюллер футбол тарихидаги энг буюк футболчи борасида ўз танловини билдирди. Германиялик футболчи Криштиану Роналду ва Лионел Месси ўртасидаги баҳсда аргентиналик ҳужумчини устун кўришини айтди.
«Менга бу саволни жуда кўп марта беришган. Фаолиятимнинг дастлабки ўн йилида Криштиануни танлардим. Аммо умумий манзарага қарайдиган бўлсак, шуни айтишим керакки, энг буюк футболчи — бу албатта энг яхши тўпурар ёки энг кўп соврин ютган футболчи дегани эмас. Гарчи 2022 йилдан кейин у жуда муҳим совринни ҳам қўлга киритган бўлса-да, мен учун бу Лионел Месси», — деди Мюллер.
Германиялик футболчи Мессининг жаҳон чемпионатидаги фаолияти, шунингдек, унинг узоқ йиллар давомида мухлисларга завқ улашганини алоҳида таъкидлади.
«Унинг жаҳон чемпионатида қилган ишлари, ҳозир қилаётганлари... Аммо бундан олдин ҳам у ўз ўйини билан одамларга қувонч улашган. Бу бир неча йил эмас, қарийб йигирма йил давом этди. Статистикаси ва унинг ўйинидан олинадиган завқ — айнан шу сабабли мен Мессини танлайман», — деди Мюллер.
Маълумот учун, Томас Мюллер фаолиятининг катта қисмини «Бавария»да ўтказган. У 2025 йилда Мюнхен клубини тарк этиб, «Ванкувер Уайткапс» сафига қўшилган.
Эслатиб ўтамиз, Месси ва Роналду футбол тарихидаги энг буюк футболчи мақоми учун узоқ йиллардан бери давом этиб келаётган баҳснинг асосий иштирокчилари ҳисобланади.
